ކޮވިޑް ގެ ސަބަބުން ހާލުގައި ޖެހޭ މީހުނަށް ޒަކާތް ދިނުން ޖާއިޒް: ޝަހީމް
ކޮވިޑް19 ގެ ސަބަބުން ވަޒީފާ ގެއްލި، އަތް މަތި ދަތިވެ ހާލުގައި ޖެހޭ ކޮންމް މުސްލިމަކަށް ޒަކާތް ދިނުން ޖާއިޒްވާނެ ކަމުގައި ކުރީގެ އިސްލާމިކް މިނިސްޓަރ ޑރ. މުހައްމަދު ޝަހީމް އަލީ ސައީދު ވިދާޅުވެއްޖެއެވެ.
އެގޮތުން ޝަހީމް ކުރެއްވި ޓްވީޓެއްގައި ވިދާޅުވީ އެދަތި ކަމަކީ ވަގުތީ ދަތިކަމެއް ކަމުގައި ވިޔަސްވެ އެފަރާތްތަކަށް ޒަކާތް ދިނުން ޖާއިޒްވެގެންވާނެ ކަން ފާހަގަކޮށްފައެވެ. އަދި އެ ފަރާތްތަކަކީ ޒަކާތް ހައްގުވާ މީހުންގެ ތެރެއިން ވާނެ ބައެއް ކަމަށް ވެސް ޝަހީމް ވިދާޅުވެފައިވެއެވެ.
ޒަކާތުގެ ގޮތުގައި ދެ މިލިއަނަށް ވުރެ ގިނަ ފައިސާ ލިބިފައިވާ އިރު މިއަހަރު ފިތުރު ޒަކާތް ބެހުމަށް ހަމަޖެހިފައިވަނީ މިދިޔަ އަހަރުގެ ފަގީރުންގެ ލިސްޓަށް ކަމުގައި މީގެ ކުރިން އިސްލާމިކް މިނިސްޓްރީ އިން ވަނީ ހާމަކޮށްފައެވެ.
އެކަމާއި ގުޅިގެން ޝަހީމް މީގެ ކުރިން ވެސް ވަނީ އެކަމަށް ވަރަށް ބޮޑަށް ފާޑު ވިދާޅުވެފައެވެ. އެކަމާ ގުޅިގެން ޝަހީމް ކުރިން ކުރެއްވި ޓްވީޓެއްގައި ވިދާޅުވީ މިދިޔަ އަހަރުގެ ހާލަތު މިއަހަރުގެ ހާލަތާ ތަފާތު ކަމަށާއި މިހާރު އެތައް ބައެއްގެ ވަޒީފާ ގެއްލި މީހުން ހާލުގައި ޖެހިފައިވާއިރު މިދިޔަ އަހަރުގެ ލިސްޓަށް އަމަލުކުރުމަކީ ޝަރުއީ ނަޒަރުން ބަލާއިރު ވެސް ހަމަޖެހޭ ކަމެއް ނޫން ކަމަށެވެ.
އަދި "ދީނީ ކަންކަން ކުރަންޖެހޭނީ ހާލަތަށް ރިއާޔަތްކޮށް" ޝަހީމް ވިދާޅުވިއެވެ.
ކޮވިޑް-19ގެ ސަބަބުން އެހެން އަހަރުތަކާއި ހިލާފަށް މިފަހަރު ޒަކާތް ހައްގުވާ ފަރާތްތަކުގެ އެކައުންޓަށް ޖަމާކޮށްދޭން ވަނީ ނިންމާފައެވެ.
Ads by STO
