ރިސޯޓުތަކުގެ ކުލި ހަ މަހަށް ފަސްކޮށްދޭން ނިންމައިފި
މި އަހަރުގެ ފަހު ހަ މަސް ދުވަހު ރިސޯޓުތަކުގެ ބިމު ކުލި ދައްކަން ޖެހޭ މުއްދަތު ފަސްކޮށްދޭން ނިންމަވާފައިވާ ކަމަށް ރައީސް އިބްރާހިމް މުހައްމަދު ސޯލިހު މިރޭ ވިދާޅުވެއްޖެ އެވެ.
މީގެ އިރުކޮޅެއް ކުރިން ގައުމާ މުޚާތަބު ކުރައްވަމުން ރައީސް ވިދާޅުވީ މިގޮތަށް ނިންމެވީ ކޮވިޑް-19 އަށް ފަހު، ރާއްޖޭގެ ޓޫރިޒަމް އަލުން ފަށާ އިރު، ރިސޯޓުތަކަށް ލުއިފަސޭހަ ގޮތްތަކެއް ހޯދައިދިނުމުގެ ގޮތުން ކަމަށެވެ.
މީގެ އިތުރުން ވެސް އިގްތިސާދީ ހަރަކާތްތައް ފެށުމަށްޓަކައި އެކިއެކި ދާއިރާތަކަށް ވެސް ބޮޑެތި ލުއިތަކެއް ދެއްވާނެ ކަމަށް ރައީސް ވިދާޅުވިއެވެ. އެގޮތުން ދަނޑުވެރިކަމުގެ ދާއިރާ އަށް ދޫކޮށްފައިވާ ބިމުގެ ކުލިން ވެސް ލުއިތަކެއް ދެއްވާނެ ކަމަށް އެ މަނިކުފާނު ވިދާޅުވި އެވެ.
"ދަނޑުވެރިކަމަށް ދޫކޮށްފައި ހުރި ރަށްތަކުގެ ވެސް ކުރިއަށް އޮތް ހަ މަހުގެ ބިމު ކުލި ދައްކަންޖެހޭ މުއްދަތު ފަސްކޮށްދިނުމަށް ސަރުކާރުން މިހާރު ވަނީ ނިންމާފައި،" ރައީސް ވިދާޅުވި އެވެ.
ރައީސް ސޯލިހު ވިދާޅުވީ ރިސޯޓުތަކުގެ ކުއްޔާއި ދަނޑުވެރި ކަމަށް ދޫކޮށްފައިވާ ބިންތަކުގެ ކުލީގެ އިތުރުން ފިނޭންސް މިނިސްޓްރީން ކުއްޔަށް ދީފައިވާ އެހެން ހުރިހާ ބިންތަކުގެ ކުލި ވެސް ހަ މަސް ދުވަހަށް ފަސްކޮށްދިނުމަށް ނިންމާފައިވާ ކަމަށެވެ.
Ads by STO
