މި ދަނޑިވަޅުގައި އެންމެންގެ ހިމާޔަތާއި ސަމާލުކަން ލިބޭނޭ ގޮތަށް ކަންތައްތައް ކުރުން މުހިންމު: ޝާހިދު
މި ދަނޑިވަޅުގައި އެއްވެސް ބަޔަކު ބާކީ ނުވާނޭހެން، އެންމެންގެ ހައްގުތަކަށް ވެސް ލިބިދޭންޖެހޭ ހިމާޔަތާއި ސަމާލުކަން ލިބޭނޭ ފަދަ އުސޫލަކުން ކަންތައްތައް ބައްޓަން ކޮށްގެން ކުރިއަށް ދިޔުމަކީ މުހިންމު ކަމެއްކަމަށް ހާރިޖީ ވަޒީރު ޢަބްދުﷲ ޝާހިދު ވިދާޅުވެއްޖެއެވެ.
ޝާހިދު މިހެން ވިދާޅުވެފައި ވަނީ ބައިނަލްއަގުވާމީ އިންސާނީ ހައްގުތަކުގެ ދުވަހުގެ މެސެޖުގައެވެ. ކޮވިޑް-19 މި ބަލިމަޑުކަމުގެ ތެރޭގައި އިންސާނިއްޔަތަށް އަޅާލަން ޖެހިފައިވާ މިންވަރު އިތުރުވެފައިވާ މި ދަނޑިވަޅުގައި އެއްވެސް ބަޔަކު ބާކީ ނުވާނޭހެން ކަންތައް ކުރުމަކީ މުހިންމު ކަމެއް ކަމަށް ޝާހިދު ވިދާޅުވިއެވެ.
ޝާހިދު އިތުރަށް ވިދާޅުވީ ބައިނަލްއަގުވާމީ މުޖްތަމައުއިން ކަށަވަރުކުރާ އިންސާނީ ހައްގުތައް، ރާއްޖޭގެ ގާނޫނު އަސާސީއިން ވެސް ކަށަވަރު ކުރުމަށް އަހަންމިއްޔަތުކަން ދޭ ކަމަށެވެ. އަދި އިންސާނީ ހައްގުތައް ދިފާއު ކުރުމާއި، ނެގެހެއްޓުމަކީ ދިވެހިރާއްޖޭގެ ހާރިޖީ ސިޔާސަތުގެ އެއް ތަނބު ކަމަށް އެމަނިކުފާނު ވިދާޅުވިއެވެ.
އިންސާނީ ހައްގުތައް ހިމާޔަތް ކުރުމުގައި އިތުރު ކުރިއެރުންތައް ހާސިލްކުރަން ސަރުކާރުން އެދޭ މިންވަރާއި ، ކުރާ އުންމީދު،ކުރިޔަށްވުރެ ވެސް ވަރުގަދަ ވެފައިވާ ކަމަށް ޝާހިދު ފާހަގަ ކުރެއްވިއެވެ.
ބައިނަލްއަގުވާމީ އިންސާނީ ހައްގުތަކުގެ ދުވަހުގެ މޮޓޯ އަކީ "ރިކަވަރ ބެޓަރ – ސްޓޭންޑް އަޕް ފޯ ހިޔުމަން ރައިޓްސް" މިއެވެ.
