ޗައިނާއިން ރާއްޖެއަށް އިތުރު ސިއްޙީ ސާމާނު ހަދިޔާ ކޮށްފި
ކޮވިޑް-19އާ ދެކޮޅަށް ރާއްޖެއިން ކުރަމުންދާ މަސައްކަތަށް އެހީތެރިވުމުގެ ގޮތުން ޗައިނާގެ ކުންފުންޏަކުން އަނެއްކާވެސް ރާއްޖެއަށް ސިއްޙީ ސާމާނު ފޯރުކޮށްދީފިއެވެ.
މި ތަކެތި ހަދިޔާ ކޮށްފައި ވަނީ ޗައިނާ މެޝިނަރީ އިންޖިނިއަރިން ކޯޕަރޭޝަން (ސީމެކް) ކުންފުނިންނެވެ. ސީމެކުން ހަދިޔާކުރި ތަކެތީގެ ތެރޭގައި ހިމެނެނީ ޕީޕީއީ، ފޭސް މާސްކް، އަދި ގޮގްލްސްއެވެ.
ސީމެކުން މިތަކެތި ހަދިޔާކޮށްފައި ވަނީ ފޮރިން މިނިސްޓްރީއާއި، ޖެންޑަރ މިނިސްޓްރީއާއި ކަސްޓަމްސް އަދި އިމިގްރޭޝަނަށެވެ. މިތަކެއްޗާއި ރާއްޖޭގެ ފަރާތުން ހަވާލުވެވަޑައިގެންނެވީ ފޮރިން މިނިސްޓަރ އަބްދުﷲ ޝާހިދެވެ.
ކޮވިޑް އާއި ދެކޮޅަށް ރާއްޖެއިން ކުރާ މަސައްކަތަށް އެހީީވުމުގެ ގޮތުން ޗައިނާގެ ސަރުކާރާއި އެގައުމުގެ ބައެއް ކުންފުނިތަކުން ވަނީ މީގެކުރިން ވެސް ރާއްޖެއަށް ސިއްހީ ގިނަ ސާމާނުތަކެއް ހަދިޔާކޮށްފައެވެ.
މިކަމާ ގުޅިގެން ޗައިނާއިން ރާއްޖެއަށް ކަނޑައަޅާފައި ހުންނަވާ ސަފީރު ޒޭންގް ލިޝޮންގު ވިދާޅުވީ މިވަގުތު އެންމެ މުހިންމީ އެކަކު އަނެކަކަށް އެހީވުން ކަމަށާއި އެކި ގައުމުތަކުގެ ސަޕޯޓާއެކު ވީ އެންމެ އަވަހަކަށް ރާއްޖެއިން ކޮވިޑް ނައްތާލެވޭނެ ކަމަަށް އުންމީދު ކުރާ ކަމަށެވެ.
