މަޖިލީހުން ދިން ލަފާގެ ތެރޭގައި ކުރިޔަށް އޮތް ދެ އަހަރުގެ ތެރޭގައި ރާއްޖޭގައި 2 ލައްކަ ރުއް އިންދުން ހިމެނޭ
ކުރިއަށް އޮތް އަހަރުތެރޭ، މުޅި ރާއްޖޭގައި 2 ލައްކަ ރުއް އިންދުމަށް ރައްޔިތުންގެ މަޖިލީހުގެ އެންވަޔަރަމެންޓް އެންޑް ކްލައިމެޓް ޗޭންޖު ކޮމިޓީއިން ލަފާދީފިއެވެ.
އެ ކޮމިޓީ އިން ވަނީ ކުރިއަށް އޮތް 1 އަހަރު ތެރޭގައި ރާއްޖޭގައި 2 ލައްކަ ރުއް އިންދުމުގެ ޕްރޮގްރާމެއް ހިންގައި ނިންމުމަށް ހުށަހަޅާފައެވެ. ސަބަބަކީ ރާއްޖޭގައި ހުރި ރުއްތަކަކީ މުސްކުޅި ވެފައިވާ ރުއްކަތެއް ކަމަށް ތަޖުރިބާކާރުން ބުނާތީ ކަމަށް އެ ރިޕޯޓުގައިވެއެވެ. މީގެ އިތުރުން މީހުން ދިރިއުޅޭ ކޮންމެ ރަށެއްގައި ކޮންމެ 5 އާއިލާއަކަށް އެއް ބަނބުކެޔޮ ގަސް ހެއްދުމުގެ ޕްރޮގްރާމެއްވެސް ކައުންސިލްތަކުން ހިންގުމަށް ވަނީ ލަފާދީފައެވެ.
އަދި، ދިރިއުޅުމަށް ދޫކުރާ ގޯތިތަކުގައި ކޮންމެވެސް ވަރެއްގެ ބަގީޗާއެއް ހެއްދުމަށްވެސް ޤަވާއިދު ކަނޑައެޅުމަށް ހުށަހަޅާފައިވެއެވެ. އަދި ދަނޑުވެރިކަމަށް ބޭނުން ކުރާ ގަސްކާނާ އާއި، އޯގަނިކް ބޭސް ރާއްޖެއަށް ބޭނުންވާ މިންވަރަށް އުފެއްދުމުގެ ޕްރޮގްރާމެއް ފެށުމަށްވެސް ވަނީ ހުށަހަޅާފައެވެ.
މީގެ އިތުރުން، ރަށްރަށުގައި ބާނާ ފަރުމަސް ސަރުކާރަށް ގަނެވޭނެ ގޮތެއް ކަނޑައެޅުމަށް ވެސް ވަނީ ހުށަހަޅާފައެވެ. އަދި އިތުރުންވެސް ދަނޑުވެރިކަމާއި ގުޅޭ ގިނަ ކަންކަން މި ރިޕޯޓުގައި ހިމަނާފައިވެއެވެ.
ކޮވިޑު-19 ގެ ސަބަބުން، ރާއްޖޭގެ އިޤްތިސާދަށް އައިސްފައިވާ ހީނަރުކަމުން އަރައިގަތުމަށް ސަރުކާރުން ހިންގުމަށް ނިންމާފައިވާ ޕްރޮގްރާމް ތަންފީޒު ކުރުމުގައި ތިމާވެއްޓަށާއި، އިއާދަކުރަނިވި ހަކަތަ ބޭނުންކުރުމަށް އަދި މިފަދަ ކަންކަން ބޭނުންކުރުމަށް ބަލާ އެކަންކަން ފުރިހަމަކުރުމަށް، އެ ޕްރޮގްރާމްތައް ހިންގާނެ އުސޫލުތަކެއްގެ ލަފާ ސަރުކާރަށް ދިނުމާއި ގުޅޭގޮތުން އެންވަޔަރަންމަންޓް އެންޑް ކްލައިމެޓް ޗޭންޖް ކޮމިޓީ ދިރާސާކޮށް ނިންމިގޮތުގެ ރިޕޯޓުގައި ވަނީ 25 ކަމެއް ސަރުކާރަށް ހުށަހަޅާފައެވެ.
