މަނަދޫއިން ކޮވިޑް19 ޖެހުމަށްފަހު ރަނގަޅުވި މީހާ ނިޔާވެއްޖެ
ނ. މަނަދޫ އިން ކޮވިޑް-19 އަށް ފައްސިވުމަށްފަހު ބަލިން ރަނގަޅުވި މީހާ ނިޔާވެއްޖެ އެވެ. ނިޔާވެފައިވަނީ މަނަދޫއިން ކޮވިޑަށް ފަައްސިވުމަށްފަހު، ބަލިން ޝިފާ ލިބުނު 80 އަހަރުގެ އަންހެން މީހަކެވެ.
މިމީހާ ނިޔާވެފައިވަނީ މިއަދު އިރުއޮއްސުނު ފަހުން ކަމަށް، ޢާއިލާއާ ހަވާލާދީ "ވަގުތު" ނޫހުން ރިޕޯޓްކުރެއެވެ. އެނޫހުން ރިޕޯޓްކޮށްފައިވާ ގޮތުގައި އެމީހާގެ ހާލު ސީރިއަސްވެގެން ރެއިން ފެށިގެން އޭނާއަށް ދަރުމަވަންތަ ހޮސްޕިޓަލުގެ އައިސީޔޫގައި ދިޔައީ ފަރުވާދެމުންނެވެ.
ނިޔާވި މީހާ ކޮވިޑް-19 އަށް ފައްސިކަން އެނގުނީ އިތުރު ފަރުވާއަށް މާލެއަށް ފޮނުވާލި ފަހުންނެވެ. އޭނާ މަނަދޫ ހޮސްޕިޓަލަށް ގެންގޮސްފައި ވަނީ ބަނޑުގައި ރިއްސާތީއެވެ. އަދި އިތުރު ފަރުވާއަށް އޭނާ މާލެ ގެނައި ފަހުން ކޮވިޑް-19އަށް ފައްސިވިކަން އެނގިފައި ވަނީ، އައިޖީއެމްއެޗްގައި އޮންނަ އުސޫލުގެ ތެރެއިން ޓެސްޓު ކުރުމުންނެވެ.
ދައުލަތުގެ މީޑިއާ ޕީއެސްއެމްއަށް މީގެ ތިން ދުވަސް ކުރިން މައުލޫމާތު ދެއްވަމުން މިނިސްޓަރ އަމީން ވިދާޅުވީ، އުމުރުން ދުވަސްވީ މީހުންގެ ތެރެއިން މަނަދޫން ކޮވިޑް-19 އަށް ފައްސިވި އުމުރުން 80 އަހަރުގެ މީހާ އަށް ފަރުވާދީފައިވަނީ އައިޖީއެމްއެޗުގައި ކަމަށާއި އެމީހާ ބަލިން ރަނގަޅުވެފައިވާ ކަމަށެވެ. މަނަދޫން މިހާރު މި މީހާއާ ކޮންޓެކްޓްވި ނުވަ މީހަކު ވަނީ މި ބައްޔަށް ފައްސިވެފައެވެ.
