75 ހާސް ރުފިޔާގެ ބަދަލުގައި 69 ހާސް ރުފިޔާ މުސާރައިގެ ގޮތުގައި ނަންގަވަން އީވާ ނިންމަވައިފި
ދައުލަތުގެ އިސް ވެރިންގެ މުސާރަ ކުޑަކުރަން ރައްޔިތުންގެ މަޖިލީހުން އިއްޔެ ގެނައި ބަދަލާ އެކު، ތިން ބާރުގެ ވެރިންނަށް ވުރެން ވެސް ބޮޑު އަދަދެއް މުސާރަ އާއި އިނާޔަތްތަކުގެ ގޮތުގައި ލިބިވަޑައިގަންނަވާ ރައްޔިތުންގެ މަޖިލީހުގެ ނައިބު ރައީސް އީވާ އަބްދުﷲގެ މުސާރަ މަޖިލީހުގެ މެމްބަރުންނާ އެއްވަރަށް ކުޑަކުރައްވަން ނިންމަވައިފި އެވެ.
މަޖިލީހުގެ އިދާރާ އިން މިއަދު ބުނީ އީވާ އަށް، އެހެން މެންބަރުންނާ އެއްވަރުގެ މުސާރައެއް ދެއްވުމަށް އޭނާ އެދިވަޑައިގެންފައިވާތީ، އެ ގޮތަށް އަމަލުކުރަން ނިންމާފައިވާ ކަމަށެވެ.
އީވާން ނިންމެވީ 75،000ރ ގެ ބަދަލުގައި 69،750ރ. މުސާރައިގެ ގޮތުގައި ނެންގެވުމަށެވެ. މިއީ، ކޮވިޑް-19 އާ ގުޅިގެން ދައުލަތުން ބޮޑެތި އަދަދުތަކުން މުސާރަ އާއި އިނާޔަތްތައް ދޭ ބޭފުޅުންގެ އިނާޔާތްތައް ކުޑަކުރުމުން މަޖިލީހުގެ މެމްބަރަކަށް ޖެހޭ އަދަދެވެ. މީގެ ތެރޭގައި 20،000ރ. ގެ ކޮމިޓީ އެލަވަންސް 20،000ރ. ގެ ލިވިން އެލަވަންސް ހިމެނެ އެވެ.
ވެރިންގެ މުސާރަތައް ކުޑަކުރަން ނިންމި އާ ބަދަލާއެކު މަހަކު 75،000ރ. މުސާރަ އާއި އިނާޔަތްތަކުގެ ގޮތުގައި މަޖިލީހުގެ ނައިބު ރައީސް އީވާއަށް ކުރިން ލިބިވަޑައިގަންނަވާނެ އެވެ. އީވާގެ މުސާރައިން 30 ޕަސެންޓް އުނިކުރިޔަސް، އެހެން މަގާމުތަކަށް ވުރެ އޭނާގެ މުސާރަ އާއި އިނާޔަތްތައް ބޮޑުވާ ސަބަބަކީ ކޮޮމެޓީ އެލަވަންސްގެ ގޮތުގައި ލިބޭ 20،000ރ. ގެ ސަބަބުންނެވެ.
މެމްބަރުންގެ އަސާސީ މުސާރައިން 30 ޕަސެންޓް އުނިކުރިޔަސް، ކޮމެޓީ އެލަވަންސާއި ލިވިން އެލަވަންސް އިން އެއްވެސް ބައެއް އުންޏެއް ނުކުރެ އެވެ.
މަޖިލިސް މެމްބަރުންގެ މުސާރައިން 30 ޕަސެންޓް އުނިކުރުމުން، ކޮމެޓީ އެލަވަންސާ އެކު މަހަކު 82،500ރ. ލިބެމުން އައި މެމްބަރުންނަށް ދެން ލިބޭނީ މަހަކު 69،750ރ. އެވެ.
