ކޮވިޑް-19: މާލެ ސަރަޙައްދުގެ ގެސްޓްހައުސްތަކުގެ މުވައްޒަފުން މަހަކު އެއްފަހަރު ޓެސްޓު ކުރަން ޖެހެނީ
މާލޭ ސަރަހައްދުގެ ގެސްޓްހައުސްތަކާއި ފަތުރުވެރިން ބައިތިއްބާ ހޮޓާތަކުގެ މުވައްޒަފުން މަހަކު އެއްފަހަރު ކޮވިޑް-19 އަށް ޓެސްޓް ކުރަން ޖެހޭނެ ކަމަށް ހެލްތު ޕްރޮޓެކްޝަން އެޖެންސީ (އެޗްޕީއޭ) އިން އާއްމުކުރި މާލޭ ސަރަހައްދުގެ ގެސްޓްހައުސްތަކުން އަލަށް އަމަލު ކުރަން ޖެހޭ ގައިޑްލައިންގައި ބުނެފިއެވެ.
މިހިނގާ ޑިސެމްބަރު މަހުގެ 15ވަނަ ދުވަހުން މާލެ ސަރަޙައްދުގެ (މާލެ، ވިލިމާލެ، ހުޅުމާލެ) ގެސްޓްހައުސްތައް އަލުން ހުޅުވުމުގެ ހުއްދަ ވަނީ ދީފައެވެ.
އެކަމާ ގުޅިގެން އެޗްޕީއޭ އިން މިރޭ ވަނީ ގެސްޓްހައުސްތަކުން ޢަމަލުކުރަން ޖެހޭ ގައިޑްލައިނެއް އާއްމު ކޮށްފައެވެ.
އެޗްޕީއޭ އިން އާއްމުކޮށްފައިވާ ގައިޑްލައިނުގައި ބުނެފައިވާ ގޮތުގައި ގްރޭޓާ މާލޭ އޭރިޔާގެ ގެސްޓްހައުސްތަކާއި ހޮޓާތަކުން ކޮވިޑް-19 ފެތުރުމުގެ ރިސްކު ބޮޑެވެ. އެހެންކަމުން ގެސްޓްހައުސްތަކާއި ހޮޓާތަކުގައި މަސައްކަތް ކުރާ މުވައްޒަފުން ކޮންމެ މަހަކު ކޮވިޑް-19 ޕީސީއާރް ޓެސްޓެއް ކުރަން ޖެހޭނެ ކަމަށް ގައިޑްލައިންގައި ބުނެފައި ވެއެވެ.
މިގައިޑްލައިނުގައި ހުރި އެހެން ކަންތައްތަކަކީ މާލެ ސަރަހައްދު ފިޔަވައި އެހެން ސަރަހައްދުތަކުގެ ގެސްޓްހައުސްތަކުގައި ވެސް އަމަލު ކުރަން އެޗްޕީއޭ އިން ކަނޑައަޅާފައިވާ ކަންކަމެވެ. އޭގެތެރޭގައި ފަތުރުވެރިން ރާއްޖެ އަންނައިރު 72 ގަޑިއިރު ހަމަނުވާ ކޮވިޑް-19 އަށް ޓެސްޓް ކޮށްފައި އޮންނަ ލިޔުމެއް ހުށަހަޅަން ޖެހުމާއި ރާއްޖެ އިން ފުރުމުގެ 48 ގަޑިއިރުގެ ކުރިން ކޮވިޑް-19 އަށް ޓެސްޓް ކުރުން ހިމެނެއެވެ. އަދި ރާއްޖެ އިން އެއްވެސް ފަތުރުވެރިޔަކަށް ފުރޭނީ ކޮވިޑް-19 އަށް ޓެސްޓްކޮށް ނަތީޖާ ނައްސިވުމުންނެވެ.
