ޖަޕާން މީހެއްގެ އަތުން 15 މިލިއަން ޑޮލަރު އަތުލި ވާހަކަ ގާސިމް ދޮޮގުކުރައްވައިފި
ޖުމްހޫރީ ޕާޓީގެ ލީޑަރު ގާސިމް އިބްރާހިމް، ޖަޕާން މީހެއްގެ އަތުން 15 މިލިއަން ޑޮލަރު އަތުލައި ގަނެފައިވާ ކަމަށް ބުނެ ކުރީގެ ތިމަރަފުށި ދާއިރާގެ ކުރީގެ މެމްބަރު މުހައްމަދު މުސްތަފާ ވިދާޅުވި ވާހަކަތައް ގާސިމް ދޮގު ކުރައްވައިފިއެވެ.
މުސްޠަފާ އިއްޔެ ކުރެއްވި ޓްވީޓެއްގައި ވިދާޅުވެފައި ވަނީ ގާސިމް، ޖަޕާނު މީހެއް އިނދަ ޖައްސާލާފައިވާ ކަމަށާއި، 15 މިލިއަން ޑޮލަރު އޭނާގެ އަތުން "ކައްވާލާފައި" ވާކަމަށެވެ.
މީގެ އިތުރުން މުސްޠަފާ ކުރެއްވި ޓްވީޓްގައި ވަނީ ސަރުކާރުގެ ކޯލިޝަނެއް ކިޔައިގެން އުޅެނީ ވައްކަން ކުރަން ކަމަށާއި އިތުރަށް ގާސިމް އެއްޗެކޭ ވިދާޅުވެއްޖެނަމަ މުޅި އެތި ފަޅާ އަރުވާލާނެ ކަމަށެވެ.
މުސްތަފާގެ ވާހަކަތަކަށް ރައްދު ދެއްވަމުން ގާސިމް ކުރެއްވި ޓްވީޓެއްގައި ވިދާޅުވީ މުސްޠަފާ އޭނާއޭ ކިޔައިގެން ޓްވިޓާގައި ދައްކާފައި ވަނީ އެއްވެސް ހަގީގަތެއް ނެތް ދޮގު ވާހަކަތަކެއް ކަމަށެވެ.
"އެއީ އެއްވެސް މިންވަރެއްގެ ޙަޤީޤަތެއް ނެތް ބުހުތާން ދޮގު ވާހަކަ. މިފަދަ ނުބައި މީހުންގެ ދޮގު ވާހަކަތަކުން މުޅި އިންސާނިއްޔަތު ސަލާމަތް ކުރައްވާށި، އާމިން." ގާސިމް ވިދާޅުވިއެވެ.
