ފެނާއި ކަރަންޓު ބިލުން 60 މިލިއަން ރުފިޔާގެ ޑިސްކައުންޓް ދީފިން: އަމީރު

ރިލީފް ޕެކޭޖްތަކުގެ ތެރޭގައި ހިމެނޭ ކަރަންޓާއި ފެނުގެ ޑިސްކައުންޓްގެ ގޮތުގައި މިހާތަނަށް 60 މިލިއަން ރުފިޔާ ހޭދަކޮށްފައިވާ ކަމަށް ފިނޭންސް މިނިސްޓަރު އިބްރާހިމް އަމީރު ވިދާޅުވެއްޖެއެވެ.

Ads by Sosun Fihaara

މިއަދު ބޭއްވި ނޫސްވެރިންގެ ބައްދަލުވުގައި މިނިސްޓަރު އަމީރު ވިދާޅުވީ ކޮވިޑް-19އާ ގުޅިގެން ތައާރަފްކުރި އިކޮނޮމިކް ރިލީފް ޕެކޭޖްގެ ދަށުން 2.5 ބިލިޔަން ރުފިޔާ ޚަރަދުކުރުމަށް ހަމަޖެހިފައިވާކަމަށެވެ.

އެގޮތުން ފެނާއި ކަރަންޓް ބިލުން ޔޫޓިލިޓީސް ޑިސްކައުންޓްގެ ގޮތުގައިވެސް ބޮޑު އަދަދެއް ޚަރަދުކޮށްފައިވާކަމަށް މިނިސްޓަރު ވިދާޅުވިއެވެ. އެގޮތުން ފެނަކަ ކޯޕަރޭޝަނާއި، އެމްޑަބްލިއުއެސްސީ އާއި ސްޓެލްކޯ މެދުވެރިކޮށް، 46،417 ގޭބިސީއެއްގެ ފެންބިލްތަކަށް 10.9 މިލިޔަން ރުފިޔާ ޚަރަދުކޮށްފައިވާކަމަށާއި ހަމަ އެކުންފުނިތައް މެދުވެރިކޮށް ދޭ ކަރަންޓުގެ ޚިދުމަތުން 92،599 ގޭބިސީއެއްގެ ކަރަންޓް ބިލަށް 49.7 މިލިޔަން ރުފިޔާ މިހާތަނަށް ޚަރަދުކޮށްފައިވާކަމަށް މިނިސްޓަރު އަމީރު ވިދާޅުވިއެވެ.

"ކޮވިޑް19އާ ގުޅިގެން ސަރުކާރުން ތާރަފްކުރި އިކޮނަމިކް ރިލީފް ޕެކޭޖްގެތެރެއިން އެވްރެޖްކޮށް ކޮންމެ ގޭބިސީއެއްގެ ފެންބިލުން 235 ރުފިޔާ އަދި އަދި ކަރަންޓް ބިލުން 500 ރުފިޔާގެ ޑިސްކައުންޓެއް ދީފައިވާނެ" އަމީރު ވިދާޅުވިއެވެ.

ކޮވިޑާ ގުޅިގެން އާންމުންގެ ދިރިއުޅުމުގައި ދިމާވާ މާލީ ދަތިތަކަށް ލުޔެއްދިނުމަށް ސަރުކާރުން ވަނީ ކަރަންޓު ބިލުން 40 ޕަސެންޓު އަދި ފެން ބިލުން 30 ޕަސެންޓު އުނިކުރުމަށް ނިންމާފައެވެ.