19 ޕަސެންޓު މީހުންގެ ޕެންޝަން ބެލެންސް އުޅެނީ 10،000ރ. އަށް ވުރެ ދަށުގައި!

ޕެންޝަން ފަންޑުގައި ބައިވެރިވެފައިވާ އާބާދީގެ 19 ޕަސެންޓް މީހުންގެ ފަންޑް ބެލެންސް އުޅެނީ 10،000ރ. އަށް ވުރެ ދަށުގައި ކަމަށް އެ އޮފީހުން ބުނެފި އެވެ.

Ads by Hajj Corporation

މިއަދު ބޭއްވި ނޫސްވެރިންގެ ބައްދަލުވުމުގައި ޕެންޝަން އޮފީހުގެ އެކްޓިން ސީއީއޯ ފާތިމަތު ސުޖާތާ ހަލީމު ވިދާޅުވީ، ޕެންޝަން ފަންޑުގައި ތިބި 154،385 މީހުންގެ ތެރެއިން ގިނަ ބަޔެއްގެ އެކައުންޓުގައި ހުރީ ވަރަށް މަދު އަދަދެއް ކަމަށެވެ.

އެގޮތުން 19 ޕަސެންޓް މީހުންގެ ފަންޑުގައި ހުރީ 10،000ރ. އަށް ވުރެ ދަށް އަދަދެއް ކަމަށާއި 55 ޕަސެންޓް މީހުންގެ ފަންޑް ބެލެންސް އުޅެނީ 100،000ރ. އަށް ވުރެ ދަށުގައި ކަމަށެވެ.

އަދި އެންމެ ބޮޑު ޕެންޝަން ފަންޑުގެ ގޮތުގައިވާ 450،000ރ. އަށް މަތީގެ އާމްދަނީގެ ޕެންޝަންގައި ހުރީ ޕެންޝަން ފަންޑުގައި ބައިވެރިވި މީހުންގެ ދެ ޕަސެންޓް މީހުންގެ ކަމަށް ސުޖާތާ ވިދާޅުވިއެވެ.

ސުޖާތާ ވިދާޅުވީ ޕެންޝަން ސްކީމުގެ ބައިވެރިންގެ ތެރެއިން 50 ޕަސެންޓު މީހުންގެ އުމުރު އުޅެނީ 45 އަހަރުން ދަށުގައި ކަމަށާއި އެ ބޭފުޅުންނަށް ފަންޑުގައި ހުރި ފައިސާ އިންވެސްޓްކޮށްގެން ރަނގަޅު ރިޓަޔަމެންޓެއް ހޯދުމުގެ ފުރުސަތު އެބައޮތް ކަމަށެވެ.

ސުޖާތާ ވިދާޅުވީ، ލިބޭ އާމްދަނީން ކޮންމެ މަހަކު ގާތްގަނޑަކަށް ހަތް ޕަސެންޓް ކެނޑިގެންދާ އިރު މި އަދަދަކީ ރިޓަޔާވާ އިރު އެ މީހަކަށް އެ މީހެއްގެ އާމްދަނީ ލިބޭނެ ވަރުގެ އަދަދެއް ކަމަށެވެ. އެހެންކަމުން މީގެއިން އިތުރު ކަންކަން ކުރަން ވިސްނައިފި ނަމަ ލިބޭ ޕެންޝަން ވަރަށް ބޮޑަށް ކުޑަވާނެ ކަމަށް އޭނާ ވިދާޅުވި އެވެ.