ބަންގްލަދޭޝްގެ އިތުރު 350 މީހަކު ގައުމަށް ފޮނުވާލައިފި
ރާއްޖޭގައި ގަވައިދާ ހިލާފަށް އުޅެމުންދާ ބަންގްލަދޭޝްގެ އިތުރު 350 މީހަކު މިއަދު އަނބުރާ ގައުމަށް ފޮނުވާލައިފި އެވެ.
މި މީހުން ފޮނުވާލާފައިވަނީ މޯލްޑިވިއަންގެ ދެ ފްލައިޓެއްގައެވެ. އެގޮތުން ބަންގްލަދޭޝްގެ ޑާކާއަށް ދިޔަ ފުރަތަމަ ފްލައިޓްގައި 198 މީހުން ދަތުރުކޮށްފައިވާ ކަމަށާއި އަދި ދެވަނަ ފްލައިޓުގައި 152 މީހަކު ދަތުރުކޮށްފައިވާ ކަމަށް މޯލްޑިވިއަން އިން ބުނެއެވެ.
ރާއްޖޭގައި ގަވައިދާ ހިލާފަށް އުޅެމުންދާ ބަންގްލަދޭޝް މީހުންގެ ތެރެއިން މިހާތަނަށް 1000 އަށް ވުރެ ގިނަ މީހުން ވަނީ އަނބުރާ ގައުމަށް ފޮނުވާލާފައެވެ.
މީގެ އިތުރުން ކޮވިޑް-19 އާ ގުޅިގެން ރާއްޖޭގައި ތާށިވެފައި ތިބި އިންޑިއާ ރައްޔިތުންގެ ތެރެއިން، އިތުރު 153 މީހަކު ވެސް މިއަދު ވަނީ ވައިގެ މަގުން ގައުމަށް ފޮނުވާލައިފި އެވެ.
މިއީ ކޮވިޑް-19ގެ ސަބަބުން އެކި ގައުމުތަކުގައި ތާށިވެފައިވާ ތިބި އެ ގައުމުގެ މީހުން އަނބުރާ ގެންދަން އިންޑިއާއިން ހިންގާ "ވަންދޭ ބަރަތު" އޮޕަރޭޝަންގެ ބައެކެވެ. ރާއްޖޭގައި މި އޮޕަރޭޝަންގެ ދެވަނަ ފޭސް އިއްޔެ ފަށައި، ވައިގެ މަގުން 152 މީހަކު ފޮނުވާލާފައި ވެ އެވެ. ފުރަތަމަ ފިޔަވަހީގައި، ކަނޑުމަގުން މަނަވަރުތަކެއްގައި 1،488 އިންޑިއާ މީހަކު ކޮޗިން އަށް ގެންގޮސްފައި ވެ އެވެ.
