އިސްލާމީ މަރުކަޒުގައި އީދު ނަމާދު ކުރާނެ: އިސްލާމިކް މިނިސްޓްރީ
އިސްލާމީ މަރުކަޒުގައި މާދަމާ ފިތުރު އީދު ނަމާދު ކުރާނެ ކަމަށް އިސްލާމިކް މިނިސްޓްރީ އިން ބުނެފި އެވެ.
"ސީއެންއެމް" ނޫހަށް މައުލޫމާތު ދެމުން އިސްލާމިކް މިނިސްޓްރީގެ މީޑިއާ އޮފިޝަލް އިސްމާއިލް އަފްރާހް ވިދާޅުވީ އެ މަރުކަޒުގައި ލޮކްޑައުންގައި ތިބި އެ މިނިސްޓްރީގެ މުވައްޒަފުން އިސްލާމީ މަރުކަޒުގައި އީދު ނަމާދު ކުރުމަށް ހަމަޖެހިފައިވާ ކަމަށެވެ. އަދި އިސްލާމީ މަރުކަޒުގައި ކުރާ ނަމާދު ޓީވީ އިން ވަގުތުން ދައްކާނެ ކަމަށް ވެސް އޭނާ ވިދާޅުވި އެވެ.
ރާއްޖޭގައި ހަލުވިކަމާއެކު ކޮވިޑް ފެތުރެން ފެށުމާ ގުޅިގެން މީގެ މަހެއްހާ ދުވަސް ކުރިން އިސްލާމިކް މިނިސްޓްރީ އިން ވަނީ ރާއްޖޭގެ ހުރިހާ ރަށެއްގައި މިސްކިތްތައް ބަންދުކޮށް ޖަމާއަތުގައި ނަމާދުކުރުން މަނާކޮށްފަ އެވެ.
ނަމަވެސް އެކަމަށް ލުޔެއް ދެއްވާ އެ މިނިސްޓްރީން ވަނީ ފާއިތުވި ހުކުރު ދުވަހުގެ ހުކުރު ނަމާދުން ފެށިގެން މޮނިޓަރިންގެ ހާލަތުގައި ނެތް ރަށްރަށުގައި ޖަމާއަތުގައި ނަމާދުކުރަން ފަށާފަ އެވެ.
މީގެ އިތުރު މިރޭ ވަނީ ހަތް ރަށް ފިޔަވައި އެހެން ހުރިހާ ރަށެއްގައި މާދަމާ ޖަމާއަތުގައި އީދު ނަމާދު ކުރުމުގެ ހުއްދަ ވެސް ދީފައެވެ.
