ޖަމާއަތުގައި ނަމާދުކުރަން ދިން ހުއްދަ ބާތިލުކުރުމުން މުޒާހަރާކޮށްފި
ށ. މިލަންދޫގައި ހުކުރު ނަމާދުކުރުމުގެ ހުއްދަ ދިނުމަށް ފަހު، ފަހުން ޖަމާއަތް ހެދުމުގެ ހުއްދަ އިސްލާމިކް މިނިސްޓްރީން ބާތިލުކުރުމުން އެކަމާއި ކަންބޮޑުވެ ރަށު ކައުންސިލު ދޮށުގައި މީހުން މުޒާހަރާކޮށްފި އެވެ.
ފުލުހުން މިއަދު ބުނީ ހުކުރު ނަމާދުކުރުމުގެ ހުއްދަ ދިނުމަށް ފަހު، ފަހުން ޖަމާއަތް ހެދުމުގެ ހުއްދަ އިސްލާމިކް މިނިސްޓްރީން ބާތިލުކޮށް ސިޓީއަކުން އެކަން މިލަންދޫ ކައުންސިލަށް އެންގުމުން އެކަން އާންމުކޮށް އިއުލާން ކުރުމާއި ގުޅިގެން އެކަމާއި ހިތްހަމަނުޖެހިގެން 100 ވަރަކަށް މީހުން ކައުންސިލް ދޮށަށް އެއްވެ މުޒާހަރާކޮށްފައިވާ ކަމަށެވެ.
ފުލުހުން އިތުރަށް ބުނީ މިލަންދޫ ކައުންސިލާއި ފުލުހުން ގުޅިގެން އެއްވެ ތިބި މީހުންނަށް ވާހަކަ ދައްކާ މައްސަލަ ހައްލުކޮށްފައިވާ ކަމަށެވެ.
އިސްލާމިކް މިނިސްޓްރީން މިރޭ ކުރި އިޢުލާނެއްގައި ބުނެފައިވަނީ މިވަގުތު ރާއްޖޭގައި ފުރަބަންދުގެ ޙާލަތުގައި ހުރި ރަށްރަށާއި، މޮނީޓަރިންގެ ޙާލަތުގައި ހުރި ރަށްރަށާއި އެ ރަށެއްގައި މީހަކު ކަރަންޓީނު ކޮށްފައިވާ ރަށްތައް ފިޔަވައި އެހެން ރަށްރަށުގައި ޖަމާޢަތުގައި ނަމާދުކުރުން އެންމެ ރަނގަޅު ކަމުގައި ކުރިން ވިދާޅުވެފައިވީނަމަވެސް ރަށެއް، މޮނީޓަރިންގެ ޙާލަތުން ދޫކޮށްލާތާ 14 (ސާދަ) ދުވަސް ނުވާނަމަ، އެ ރަށެއްގެ މިސްކިތްތަކުގައިވެސް ޖަމާޢަތް ނުހެދުމަށް، ހެލްތް ޕްރޮޓެކްޝަން އެޖެންސީން ލަފާދެއްވާފައިވާތީ، އެ ރަށްރަށުގެ މިސްކިތްތަކުގައިވެސް ޖަމާޢަތް ނުހެދުމަށް ނިންމަވާފައިވާކަމަށެވެ.
އެގޮތުން ޖަމާޢަތުގައި ނަމާދުކުރުން މަނާކޮށްފައިވާ 7 ރަށަކީ، މިވަގުތު މޮނިޓަރިންގެ ޙާލަތުގައިވާ މާލެ ސިޓީއާއި ށ.ނަރުދޫއާއި މަނަދޫގެ އިތުރުން މޮނިޓަރިންގެ ހާލަތު އުވާލިފަހުން އަދި 14 ދުވަސްނުވާ 4 ރަށް ކަމަށްވާ ކ.ހިންމަފުއްޓާއި ކ ތުލުސްދޫއާއި ހއ.ތަކަންދޫގެ އިތުރުން ށ.މިލަންދޫއެވެ.
މިލަންދޫއަކީ ކޮވިޑް-19 އަށް މީހަކު ޕޮޒިޓިވްވެފައިވާ ރަށެކެވެ. އެރަށުން ޕޮޒިޓިވްވި މީހާއަކީ އަމާޒު ބޯޓުން ދަތުރުކުރި މީހެކެވެ.
އެންމެ ފުރަތަމަ އެ ބޯޓުން ދަތުރުކުރި މީހުންގެ ތެރެއިން ޕޮޒިޓިވްވީ ށ. ނަރުދޫއަށް ނިސްބަތްވާ މީހެކެވެ. އޭގެ ފަހުން ނަރުދޫން ޖުމްލަ 11 މީހަކު ޕޮޒިޓިވްވި އެވެ.
ޖަމާއަތުގައި ނަމާދުކުރުމުގެ ފުރުސަތު އިސްލާމިކް މިނިސްޓްރީން ދީފައި ވަނީ ލޮކްޑައުން އަދި މޮނީޓަރިންގެ ހާލަތުގައި ނެތް ރަށްރަށުގެ އިތުރުން މީހަކު ކަރަންޓީން ވެސް ނުކުރާ ރަށްރަށަށެވެ.
