ކޮވިޑް19 ގެ ސަބަބުން ނިކަމެތި ވެފައިވާ ފަރާތްތަކަށް ޢީދުގެ މުނާސަބާގައި އެހީތެރިވުމަށް ރައީސް ޞާލިޙް ގޮވާލައްވައިފި
ކޮވިޑް19 ގެ ސަބަބުން ނިކަމެތި ވެފައިވާ ފަރާތްތަކަށް ޢީދުގެ މުނާސަބާގައި އެހީތެރިވުމަށްރައީސުލްޖުމްހޫރިއްޔާ އިބްރާހީމް މުޙައްމަދު ޞާލި ގޮވާލައްވައިފިއެވެ. ރައީސް ޞާލިޙް މިހެން ވިދާޅުވެފައިވަނީ، 1441 ވަނަ އަހަރުގެ ފިޠުރު ޢީދުގެ މުނާސަބަތުގައި ރައީސް، ދިވެހިރާއްޖޭގެ ރައްޔިތުންނަށް ފޮނުއްވި ތަހުނިޔާގެ ޚިޠާބުގައެވެ.
މި ޚިތާބުގައި ރައީސް ވިދާޅުވެފައިވަނީ، ޢީދަކީ މުޅި މުޖުތަމަޢު ޝާމިލްކުރަން ޖެހޭ މުނާސަބާއެއް ކަމަށާއި ކޮވިޑް19 ގެ ސަބަބުން ނިކަމެތި ޙާލަތްތައް މެދުވެރިވެފައިވާ ކިތަންމެ ބަޔަކު، މުޖުތަމަޢުގައި ތިބިކަން ހަނދާންކޮށް އެފަރާތްތަކަށް އެހީތެރިވުމަށް ގޮވާލާކަމަށެވެ.
"ޢީދަކީ، އެންމެންގެ ބައިވެރިވުމާއި މުޅި މުޖުތަމަޢުގެ ޝާމިލްވުމާއެކު، އުފާ ފާޅުކޮށް އުޅުމުގެ ދުވަހެކެވެ. ޢީދުގެ އުފާ ފާޅުކުރުން އޮތީ، މުޖުތަމަޢުގައި ތިބި ތަފާތު ފަންތިތަކާއި ތަފާތު ގިންތިތަކުގެ މީހުންގެ މެދުގައި، އެއްވެސް ތަފާތުކުރުމެއް ނޯންނާނެ ގޮތުގެ މަތީންނެވެ. މިއަދު އަޅުގަނޑުމެންނާ ކުރިމަތިވެފައިވާ، ކޯވިޑް-19ގެ ސަބަބުންވެސް، ތަފާތު ނިކަމެތި ޙާލަތްތައް މެދުވެރިވެފައިވާ ކިތަންމެ ބަޔަކު، މުޖުތަމަޢުގައި ތިބިކަން ހަނދާންކޮށް، އެމީހަކަށް ވެވުނު އެންމެ ދީލަތި ގޮތެއްގައި، އެފަދަ މީހުންނަށް އެހީތެރިވުމަކީ، މި އުފާވެރި ފިޠުރު ޢީދުގެ ދަރުމައާއި ޘަވާބު އެތައް ގުނައަކަށް އިތުރުވެގެންދާނެ ކަމެކެވެ." ހިތާބުގައި ރައީސް ވިދާޅުވިއެވެ.
މީގެ އިތުރުން،ފިޠުރު ޢީދު އަޅުގަނޑުމެންނާ ބައްދަލުކުރީ، ކެތްތެރިވުމަށާއި އިސްރާފު ނުކުރުމަށާއި އިޤްތިޞާދުކުރުމަށް އަޅުގަނޑުމެންގެ ނަފްސުތައް ތަރުބިއްޔަތުކޮށްދިން މޫސުމަކަށް ފަހުގައި ކަމަށް ވިދާޅުވެ،ރައީސް ވިދާޅުވީ، މިއީ ޤައުމުގެ އިޤްތިޞާދު ހުއްޓުމަކަށް އައިސްފައިވާ ވަގުތެއް ކަމުން، ރަމަޟާން މަހުގައި އަޅުގަނޑުމެން ހާސިލުކުރި މިދެންނެވި ސިފަތަކުގެ މަތީގައި، ކުރިއަށް އޮތް ދުވަސްތައް ހޭދަކުރެވޭތޯ ބެލުމަކީ ވަރަށް މުހިންމު ކަމެެއް ކަމަށެވެ
