އެމްއެމްޕީއާރުސީގެ ޙިޔާނާތުގެ މައްސަލަ އަދި މަރުކޮމިޝަންގެ ތަހުގީގުތައް ގޮސްފައިވާ ހިސާބު ސާފުކުރުމަށް ހުށަހަޅައިފި
މޯލްޑިވްސް މާކެޓިން އެންޑްް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރުސީ) ގެ ހިޔާނާތުގެ މައްސަލައިގެ ތަހުގީގު ގޮސްފައިވާ ހިސާބު އަދި ، މަރުކޮމިޝަނުން ބަލާ މައްސަލަތަކުގެ އަދާހަމައެއް ހޯދުމަށް ރައްޔިތުންގެ މަޖިލީހަށް ހުށަހަޅައިފިިއެވެ. މި މައްސަލަ ހުށަހަޅުއްވާފައިވަނީ ހެންވޭރު އުތުރު ދާއިރާގެ މެންބަރު އިބްރާހިމް މުޢިއްޒުއެވެ.
ރައްޔިތުންގެ މަޖިލީހުގެ ރައީސް މުޙައްމަދު ނަޝީދަށް އެޑްރެސްކުރައްވާ މުއިއްޒު ހުށަހަޅާފައިވާ ސިޓީގައި ވިދާޅުވެފައިވަނީ، އެމްއެމްޕީއާރުސީގެ ބޮޑު ޚިޔާނާތުގެ މައްސަލައާއި، ގެއްލުވާލާފައިވާ މީހުންނާއި ގޮތް ނޭނގޭގޮތަށް މަރާލާފައިވާ މީހުންގެ މައްސަލަތައް ތަހުގީގްކޮށް އިންސާފު ހޯދައި ދިނުމަކީ އެމްޑީޕީ ސަރުކާރުގެ ވައުދެއްކަމަށެވެ. އަދި ހެންވޭރު އުތުރު ދާއިރާގެ ރައްޔިތުން މުއިއްޒު މަޖިލީހަށް އިންތިޚާބުކޮށްދެއްވި އެންމެ ބޮޑު ސަބަބަކީވެސް އެއީކަމަށް މުއިއްޒުގެ ސިޓީގައި ވަނީ ވިދާޅުވެފައެވެ.
އަދި އެ މައްސަލަތަކަކީ އާންމު މަސްލަޙަތު ހިމެނޭ މައްސަލައެއްކަމަށާއި، އެ މައްސަލަތަކުގެ ތަހުގީގާއި، ދައުވާކުރުމާއި، ޝަރީޢަތްތައް ހިނގާ ގޮތުގެ މައުލޫމާތު،ހިއްސާކުރުން މަދުކަމަށް މުއިއްްޒުވަނީ ފާހަގަކޮށްފައެވެ. އެހެންކަމުން އެ މައްސަލަތައް ގޮސްފައިވާ ހިސާބު ސާފުކުރުމަށާއި، މި މައްސަލަތައް އެއްވެސް ނުފޫޒެއް ނެތި އިތުބާރު ކުރެވޭ ނިޒާމެއްގެ ތެރެއިން ބަލާ ތަހުގީގުކޮށް ނަތީޖާ ނެރެމުން ދޭތޯ ބަލާ ދިނުމަށްވެސް މެންބަރު ވަނީ ހުށަހަޅާފައެވެ.
ދާދި ފަހުން ރައީސް ނަޝީދުވެސް ވަނީ އެމްއެމްޕީއާރުސީ މައްސަލައިގައި ހަމައެކަނި ރައީސް ޔާމީން ޖަލުގައި ބާއްވަން ނުޖެހޭކަމަށް ވިދާޅުވެފައެވެ.
