ރައީސް ޔާމީން މިނިވަން ކުރުމަށް ގޮވާލައި ހުށަހެޅި ގަރާރު އަނބުރާ ގެނެސްފި!
ކުރީގެ ރައީސް ޢަބްދުﷲ ޔާމީން ޢަބްދުލްޤައްޔޫމް މިނިވަން ކުރުމަށް ގޮވާލާ، ދިވެހި ރައްޔިތުންގެ ޕާޓީ (ޑީއާރުޕީ)ގެ ލީޑަރު، ކާށިދޫ ދާއިރާގެ މެންބަރު ޢަބްދުﷲ ޖާބިރު ހުށަހޅުއްވި ޤަރާރު އަނބުރާ ގެނެސްފިއެެވެ.
ރައްޔިތުންގެ މަޖިލީހުގެ ރައީސް މުޙައްމަދު ނަޝީދަށް އެޑްރެސްކުރައްވާ ކާށިދޫ ދާއިރާގެ މެންބަރު ޢަބްދުﷲ ޖާބިރު ފޮނުއްވި ސިޓީގައި ވިދާޅުވެފައިވަނީ، 22 މޭ 2020ގައި "ދިވެހިރާއްޖޭގެ ކުރީގެ ރައީސް ޢަބްދުﷲ ޔާމީން ޢަބްދުލްޤައްޔޫމް ވަގުތުން މިނިވަން ކުރުމަށް ގޮވާލާ ހުށަހަޅާ ޤަރާރު" މި ސުރުހީގެ ދަށުން ޖާބިރު މަޖިލީހަށް ހުށަހެޅުއްވި ޤަރާރު އަނބުރާ ނެގުމަށް ނިންމާފައިވާކަމަށެވެ.
ޖާބިރު އިތުރަށް ވިދާޅުވީ، އެ ޤަރާރު އަނބުރާ ނެގުމަށް ނިންމި ސަބަބަކީ ރައީސް ޔާމީންގެ މައްސަަލައަކީ މިވަގުތ މަތީ ކޯޓުތަކުގައި ހިނގަމުންދާ މައްސަލައެއްކަމުން، އެ މައްސަލަ މަޖިލީހަށް ހުށަހަޅާ މަޖިލީހުގައި އެކަމާއިމެދު ބަހުސްކުރުމަކީ ތިންބާރު ވަކިވެފައިވާ ނިޒާމެއްގައި ކުރުން އެދެވޭކަމެއް ނޫންކަމަށެވެ.
ޤަރާރު އަންބުރާ ނެންގެވިނަމަވެސް ޖާބިރު ވަނީ ރައީސް ޔާމީންގެ ޝަރީޢަތުގެ އަޑުއެހުންތައް އަވަސްކޮށް އެމަނިކުފާނަށް އިންސާފު ހޯއްދަވާދެއްވުމަށް ގޮވާލައްވާފައެވެ.
