ލާދީނީ ޓެގް އެޅުވި ސިޔާސީ މީހުންނަށް މި ސަރުކާރުން ވަނީ ބޮޑެތި މަގާމުތައް ދީފައި: އާދަމް ޝަރީފް
ލާދީނީ ޓެގް އެޅުވި ސިޔާސީ މީހުންނަށް މި ސަރުކާރުން ވަނީ ބޮޑެތި މަގާމުތަކާއި ސެކިއުރިޓީ ދީފައި ކަމަށް މަޑުއްވަރީ ދާއިރާގެ މެމްބަރު އަދި ޕީއެންސީގެ ނައިބް ރައީސް އާދަމް ޝަރީފް އުމަރު ވިދާޅުވެއްޖެއެވެ.
އާދަމް ޝަރީފް މިހެން ވިދާޅުވީ ރައީސް މުހައްމަދު ނަޝީދުގެ އިސްތަށިފުޅުގައި ދޮގު އިލްޒާމް އަޅުވައި އެމަނިކުފާނު ކީރިތި ރަސޫލާއަށް ނިސްބަތްކޮށް އިހާނެތި ބަސް ބޭނުން ކުރެއްވި ކަމަށް ބުނެ ވާހަކަ ދެއްކި މީހާގެ މައްސަލަ ފުލުހުން ބަލަން ފެށުމާ ގުޅިގެންނެވެ.
އެކަމާ ގުޅިގެން އާދަމް ޝަރީފް ކުރެއްވި ޓްވީޓެއްގައި ވިދާޅުވީ ނިކަމަތި މީހާ ޕޮލިހަށް ކަމަށާއި ލާދީނީ ޓެގް އެޅުވި ސިޔާސީ މީހުންނަށް ލިބުނީ ބޮޑެތި މަގާމުތަކާއި ސެކިއުރިޓީ ކަމަށެވެ.
"އެމްޑީޕީން ރައީސް ނަޝީދުގެ ދިފާއުގައި ބަޔާން ނެރުނުއިރު ލާދީނީ ވާހަކަ އެންމެ ބޮޑަށް ދެއްކި މީހުންނާއެކު ރައީސް ސޯލިހުގެ ސަރުކާރު ހަނު. ބޮޑު ކެކުރި- ކުޑަ ކެކުރީގެ ތަހުގީގް" އާދަމް ޝަރީފް ވިދާޅުވިއެވެ.
Nikamethi meehaa police ah! Laadheenee tag elhuvi siyaasee meehunnah bodethi maqaamuthakaai security!MDP in RN ge dhifaaugai bayaan nerunuiru, laadheenee vaahaka emme bodah dhekki meehunnaaeku RS ge sarukaarun hanu. "Bodu kekuri- kuda kekureege thahuqeeq"
https://t.co/KsJrvzCI99— Adam Shareef Umar (@Adamshareefz) May 24, 2020
ރައީސް ނަޝީދުގެ އިސްތަށިފުޅުގައި ދޮގު އިލްޒާމް އަޅުވައި އެމަނިކުފާނު ރަސޫލާއަށް ނިސްބަތްކޮށް އިހާނަތިކޮށް ބަސް ވިދާޅުވި ކަމަށް ބުނެ ވާހަކަ ދައްކާފައި ވަނީ ރ. އަނގޮޅިތީމު ޖީޒާގެ އަލީ އިބްރާހިމް އެވެ. އޭނާއާއި އޭނާގެ އިންޓަވިއު ގެނެސްދިން މީޑިއާއާ މެދު ތަހުގީގު ކޮށް ދައުވާ ކުރުމަށް ޕްރޮސެކިއުޓާ ޖެނެރަލްގެ އޮފީހަށް ފޮނުވަން މަޖިލީހުން ވަނީ އެދިފައެވެ.
