ފަތުރުވެރިކަމުގެ ސިނާއަތުގައި މަސައްކަތް ކުރާ 'ތަރިންގެ' އަގުވަޒަން ކުރުމަށް ޕްލެޓްފޯމެއް
ރާއްޖޭގެ ފަތުރުވެރިކަމުގެ ސިނާއަތުގައި މަސައްކަތް ކުރާ 'ތަރިންގެ' އަގުވަޒަން ކުރުމަށް ވެބް ޕްލެޓްފޯމެއް ގާއިމު ކުރައްވާނެ ކަމަށް ޓުއަރިޒަމް މިނިސްޓަރ ޑރ. އަބްދުﷲ މައުސޫމް ވިދާޅުވެއްޖެއެވެ.
މިނިސްޓަރ މިހެން ވިދާޅުވެފައިވަނީ ހުކުރު ދުވަހު ކުރެއްވި ޓްވީޓެއްގައެވެ. މި ޓްވީޓުގައި ރާއްޖޭގެ ފަތުރުވެރިކަމުގެ ސިނާއަތުގައި މަސައްކަތް ކުރާ 'ތަރިންގެ' އަގުވަޒަން ކުރުމަށް 2021 ވަނަ އަހަރު ވެބް ޕްލެޓްފޯމެއް ގާއިމު ކުރައްވާނެ ކަމަށް މިނިސްޓަރު ވިދާޅުވިއެވެ.
މި ވެބް ޕްލެޓްފޯމް ތައްޔާރު ކުރަނީ 'ސްޓަރޒް އޮފް ޓުއަރިޒަމް' ގެ ނަމުގައެވެ. މި ޕްލެޓްފޯމްގެ ދަށުން މި ދާއިރާގައި މަސައްކަތް ކުރާ ދިވެހި 'ތަރިން' ގެ އަގުވަޒަން ކުރެވޭނެ ކަމަށް މިނިސްޓަރ ވިދާޅުވިއެވެ.
މިހާތަނަށް ފަތުރުވެރިކަން ކުރިއެރުވުމަށް ކުރެވުނު މަސައްކަތްތަކުގެ ސަބަބުން ރާއްޖެއަށް ގިނަ އެވޯޑުތަކެއް ވެސް ވަނީ ލިބިފައެވެ.
ވޯލްޑް ޓްރެވަލް އެވޯޑްސްއިން ދޭ އެންމެ ޝަރަފުވެރި އެވޯޑު ކަމުގައިވާ "ވޯލްޑްސް ލީޑިން ޑެސްޓިނޭޝަން" އެވޯޑް ފުރަތަމަ ފަހަރަށް ރާއްޖެއަށް މި އަހަރު ވަނީ ލިބިފައެވެ.
އަދި ފަތުރުވެރިންގެ އެންމެ މަގުބޫލުކަން ހޯދާފައިވާ 22 މަންޒިލަކާ ރާއްޖެ ވަނީ ވާދަކޮށްފައެވެ. މަގުބޫލު އެހެން ގައުމުތަކުގެ ތެރޭގައި ދުބާއީ، މެލޭޝިޔާ،ސްޕެއިން،މޮރިޝިއަސް އަދި ސްރީލަންކާ ހިމެނެއެވެ.
