އެމިރޭޓްސް އެއާލައިނުން ރާއްޖެއަށް ކުރާ ދަތުރުތައް އަނެއްކާ ވެސް އިތުރުކޮށްފި
އެމިރޭޓްސް އެއާލައިނުން ރާއްޖެއަށް ކުރާ ދަތުރުތައް އަނެއްކާ ވެސް އިތުރުކޮށްފިއެވެ.
މޯލްޑިވްސް އެއާޕޯޓްސް ކޮމްޕެނީ ލިމިޓެޑް (އެމްއޭސީއެލް) އިން މިކަން ހާމަ ކޮށްފައި ވަނީ ކުރި ޓްވީޓެއްގައެވެ. އެ ޓްވީޓުގައި ވަނީ ހުކުރު ދުވަހުން ފެށިގެން އެ އެއާލައިނުން ރާއްޖެއަށް ދުވާލަކު ހަތަރު ފްލައިޓް ޝެޑިއުލް ކޮށްފައި ވާ ކަމަށެވެ. އަދި މިއާ ވިދިގެން އެ އެއާލައިނުން 1400 ފަތުރުވެރިން ދުވާލެއްގެ މަތިން ރާއްޖެއަށް އަންނާނެކަމަށް އަންދާޒާ ކުރާ ކަމަށެވެ.
ޓޫރިޒަމް މިނިސްޓްރީން ހިއްސާކޮށްފައިވާ ބައެއް މައުލޫމާތުތަކަށް ބަލާއިރު، ބޯޑަރުތައް އަލުން ހުޅުވާލިފަހުން ރާއްޖެއަށް އެންމެ ގިނައިން ފަތުރުވެރިން އުފުލާ އެއާލައިންތަކުގެ ތެރޭގައި އެމިރޭޓްސް ހިމެނެއެވެ. ބޯޑަރުތައް ޖުލައި މަހު ހުޅުވާލިފަހުން، އެމިރޭޓްސްގެ ފުރަތަމަ ފްލައިޓް ރާއްޖެ އައިސްފައި ވަނީ ޖުލައި މަހުގެ 16 ގައެވެ.
އެމިރޭޓްސްގެ ފުރަތަމަ ދަތުރުތައް ފަށާފައި ވަނީ ހަފްތާއަކު ފަސް ފްލައިޓް ދަތުރުކުރާ ގޮތަށް ނަމަވެސް އޮގަސްޓުން ފެށިގެން އެ އެއަރލައިންގެ ދަތުރުތައް ހަފްތާއަކު ހަ ފްލައިޓަށް ވަނީ އިތުރު ކޮށްފައެވެ.
ޓޫރިޒަމް މިނިސްޓްރީން އާންމު ކޮށްފައިވާ ތަފާސްހިސާބުތައް ދައްކާގޮތުން ބޯޑަރު ހުޅުވާލި ފަހުން މިހާތަނަށް 110،000 ފަތުރުވެރިން ރާއްޖެ ވަނީ އައިސްފައެވެ. އަދި މި އަހަރުގެ ނިޔަލަށް ރާއްޖެ އައި ފަތުރުވެރިންގެ އަދަދު ފަސް ލައްކަ އަށް އަރާނެ ކަމަށް މިނިސްޓްރީން ވަނީ ލަފާ ކޮށްފައެވެ.
Ads by STO
