އެއާ ފްރާންސްއިން ރާއްޖެއަށް ދަތުރުތައް ފަށައިފި
ކޮވިޑް-19 ގެ ބަލިމަޑުކަމާ ގުޅިގެން ބޯޑަރުތައް ބަންދު ކުރުމަށް ފަހު އަލުން ހުޅުވާލި ފަހުން، އެއާ ފްރާންސްއިން ވެސް ރާއްޖެ އަށް ކުރަމުންދާ ދަތުރުތައް އަލުން ފަށައިފިއެވެ.
ރާއްޖެ އާއި ފްރާންސް ގެ ޕެރިސް އާއި ދެމެދު އެއާ ފްރާންސްއިން އެންމެ ފުރަތަމަ ދަތުރުތައް ފަށާފައިވަނީ 2017 ވަަނަ އަހަރުގައެވެ. އެދުވަހުން ފެށިގެން މިއަހަރުގެ މާޗު މަހު ރާއްޖޭގެ ބޯޑަރުތައް ބަންދު ކުރުމާ ހަމައަށް އެއާ ފްރާންސް ގެ ދަތުރުތައް ކުރަމުން ދިޔައެވެ.
ކޮވިޑް-19 ގެ ބަލިމަޑުކަމުގެ ސަބަބުން ރާއްޖެ އާއި އެހެން ޤައުމުތަކުގެ ވެސް ބޯޑަރުތައް ބަންދު ކުރުމަށްފަހު، ރާއްޖޭގެ ބޯޑަރު ވަނީ މިއަހަރުގެ ޖުލައި މަހު އަލުން ހުޅުވާލާފައެވެ. ބޯޑަރު ހުޅުވާލި ފަހުން 22 ޤައުމެއްގެ އެއާލައިނަކުން މިހާރު ރާއްޖެއަށް އަލުން ދަތުރުތައް ވަނީ ފަށާފައެވެ.
ވެލާނާ އިންޓަނޭޝަނަލް އެއާޕޯޓުން ކޮށްފައިވާ ޓްވީޓެއްގައި ބުނެފައި ވަނީ އެއާ ފްރާންސް އިން ހަފްތާއަކު ތިން ދަތުރު ރާއްޖެއަށް ކުރާނެ ކަމަށެވެ.
ރާއްޖެއަށް ފަތުރުވެރިން އަންނަ އެންމެ ގިނަ 10 ޤައުމަށް ބަލާއިރު، ފްރާންސް އަކީ އޭގެ ތެރެއިިން އެއް ޤައުމެވެ. މިއަހަރުގެ ޖުލައި މަހުގެ 15 ވަނަ ދުވަހުން ފެށިގެން 16 ޑިސެމްބަރުގެ ނިޔަލަށް އެ ގައުމުން 3،109 ފަތުރުވެރިން ރާއްޖެ އައިސްފައި ވެއެވެ. މިއަހަރުގެ ތެރޭގައި ފްރާންސް އިން ރާއްޖެ ޒިޔާރަތްކުރި ފަތުރުވެރިންގެ އަދަދަކީ 24،033 އެވެ.
Ads by STO
