މަސައްކަތުގެ މާހައުލުގެ ރައްކައުތެރިކަމުގެ ކެމްޕޭން ލޯންޗް ކޮށްފި
މަސައްކަތުގެ މާހައުލުގެ ރައްކައުތެރިކަމުގެ ކެމްޕޭން އިފްތިތާހު ކޮށްފިއެވެ.
މި ކެމްޕޭން އިފްތިތާހު ކޮށްދެއްވީ ހޮނިހިރު ދުވަހު ދަރުބާރުގޭގައި ބޭއްވި ރަސްމިއްޔާތެއްގައި މާލެ ސިޓީގެ މޭޔަރު ޝިފާ މުހައްމަދެވެ.
މި ކެމްޕޭންގައި މީޑިއާތައް މެދުވެރިކޮށް މަސައްކަތްތެރިންނާއި އާންމުންނަށް މައުލޫމާތު ފޯރުކޮށްދިނުމާއި ފަޔަރ ސޭޕްޓީ އަދި ފަސްޓްއެއިޑްފަދަ ގުޅުންހުރި ޓްރެއިނިންތައް ކުރިއަށް ގެންދިއުމާއި، އާންމުން ހޭލުންތެރިކުރުމާއި، މިހާރު ހެދިފައި ހުރި ޤާނޫނުތަކާއި ޤަވާއިދުތައް މުރާޖާ ކުރުމާއި ތަފާސް ހިސާބު އެއްކުރުމާއި، ކަނޑައެޅިފައިވާ ނިޒާމް ހަރުދަނާކުރުން ފަދަ ގިނަ ކަންތައްތަކެއް ކުރުމަށް ނިންމާފައިވެއެވެ.
މި ކެމްޕޭނަކީ މަސައްކަތު މާހައުލުން ޖެހޭ ބަލިތަކާއި ހިނގާ ނުރައްކާތެރި ހާދިސާތަކުގައި މަރުވާ މީހުންގެ އަދަދު މަދުކުރުމާއި ނުކުޅެދުންތެރިވާ މީހުންގެ އަދަދު މަދުކޮށް މަސައްކަތްތެރީންނާއި މަސައްކަތްކުރުވާ ފަރާތްތައް އަހުލުވެރިކުރުވުމަށްޓަކައި ޕަބްލިކް އިންޓަރެސްޓް ލޯ ސެންޓަރު އަދި ހެލްތު ޕްރޮޓެކްޝަން އެޖެންސީ ގުޅިގެން ލޯންޗުކުރި ކެމްޕޭނެކެވެ.
އަންނަ އަހަރުގެ ނިޔަލަށް ކުރިއަށްގެންދަން ނިންމާފައިވާ މި ކެމްޕޭނުގެ ޝިއާރަކީ، "ހަނު ނުތިއްބަވާ، ކޮންމެ މީހެއްގެވެސް ޒިންމާއެއް އެބައޮތް" މިއެވެ. މި ކެމްޕޭންގެ ތެރެއިން އެކި މީޑިއާތައް ބޭނުންކޮށްގެން މަސައްކަތްތެރިން އަހުލުވެރިކުރުމާއި ފަޔާ ސޭފްޓީ އަދި ފަސްޓް އެއިޑް ފަދަ ޓްރޭނިން ޕްރޮގްރާމްތައް ކުރިއަށް ގެންދިޔުމާއި ޑްރާފްޓްކުރެވިފައިވާ މަސައްކަތްތެރީންގެ ސަލާމަތާއި ރައްކާތެރިކަމާ ގުޅޭ ގާނޫނުގެ ދެލިކޮޕީ މުރާޖައާކުރުމާއި ސްޓޭންޑާޑްތައް އެކުލަވައިލުން ފަދަ މުހިންމު މަސައްކަތްތައް ހިމެނެއެވެ.
