ޤުރުއާން ހިތުދަސްކުރަނީ ވަރަށް މަސައްކަތުން، ހާފިޒުން ދަރަޖަ ކުރުމަކީ އެންމެ އެދެވޭ ގޮތެއްނޫން:ޑރ.ޝަހީމް
ޤުރުއާން ހިތުދަސްކުރުމަކީ ވަރަށް މަސައްކަތުން ކުރާ ކަމެއް ކަމަށާއި ހާފިޒުން ދަރަޖަ ކުރުމަކީ އެންމެ އެދެވޭ ގޮތެއް ނޫން ކަމުގައި ކުރީގެ އިސްލާމިކް މިނިސްޓަރު ޑރ.މުހައްމަދު ޝަހީމް އަލީ ސައިދު ވިދާޅުވެއްޖެއެވެ.
ޝަހީމް މިހެން ވިދާޅުވީ ކީރިތި ގުރުއާން ހިތުދަސްކޮށް، އެއްވަނަ ދަރަޖައިގައި ފާސްވާ ހާފިޒުންނަށް، ހާއްސަ މެޑަލެއް ދިނުމަށް ރައީސުލްޖުމްހޫރިއްޔާ އިބްރާހީމް މުހައްމަދު ސޯލިހު ނިންމެވުމާ ގުޅިގެން، އެ ހަބަރު ހިއްސާ ކުރައްވައި ކުރެއްވި ޓްވީޓެއްގައެވެ.
ޝަހީމް ވިދާޅުވީ މިކަމުގައި އެންމެ ރަނގަޅު ގޮތަކީ ޙާފިޒުންގެ ދަރަޖަ ތަފާތު ކުރުމެއްނެތި އެންމެހާ ހާފިޒުންނަށް ވެސް އެބޮޑު ހަފްލާގައި ޤައުމީ އިނާމު ދިނުން ކަމަށެވެ.
”ކޮންމެ ކުއްޖަކުވެސް ޤުރުއާން ދަސްކުރަނީ ވަރަށް މަސައްކަތުން އެކުއްޖެއްގެ ޤާބިލްކަން ހުރި ވަރަކުން” ޑރ.ޝަހީމް ވިދާޅުވިއެވެ.
ރައީސް އޮފީހުން ބުނެފައިވާ ގޮތުގައި މިއަހަރުން ފެށިގެން ހާފިޒުން ދަރަޖަކޮށް މެޑަލް ދޭން ފެށުމަށް ވަނީ ނިންމަވާފައި ވާ ކަމަށެވެ.
އެގޮތުން މިމަހުގެ 26 ވަނަ ދުވަހުގެ ރޭ ޖުމްހޫރީ މައިދާނުގައި ބާއްވާ ހާއްސަ ރަސްމިއްޔާތެއްގައި ފުރަތަމަ ފަހަރަށް އެ އިނާމު ދިނުމަށް ވަނީ ހަމަޖެހިފައެވެ.
މިއަހަރުގެ ހާފިޒުންނަށް މެޑަލް ދިނުމަށް ނިންމާފައިވާއިރު އެއްވަނަ ދަރަޖައިގައި ހަތަރު ހާފިޒެއް ވަނީ ފާސްވެފައެވެ.
ކީރިތި ގުރުއާން ހިތުދަސްކޮށް ދެވަނަ އަދި ތިންވަނަ ދަރަޖައިން ފާސްވާ ހާފިޒުންނަށް ވެސް މެޑަލް ދެއެވެ. އެހެން ނަމަވެސް އެ މެޑަލް ދޭނީ ގުރުއާން ކިޔެވުމުގެ ގައުމީ މުބާރާތުގެ ނަތީޖާ ފާޅުކުރުމުގެ ރަސްމިއްޔާތުގައި ކަމަށް ރައީސް އޮފީހުން ބުނެއެވެ.
