ދެއްކުންތެރިކަމަށް ސަދަގާތް ކުރުމަކީ ޢަޒާބު ލިބެނިވި ކަމެއް: ޚުތުބާ
އިސްލާމްދީނުގައި ޝަރުޢު ކުރައްވާފައިވާ ކޮންމެ ކަމެއްގައިވެސް ޙިކުމަތެެއް ވާކަމަށާއި އެގޮތުން ޞަދަޤާތަކީ ފާފަތައް ފުއްސަވައި ސުވަރުގެއާ ހަމައަށް ތިބާ ގެންގޮސްދޭނޭ ފާލަމެއްކަމަށް މިއަދު ހުކުރު ޚުތުބާގައި ވިދާޅުވެއްޖެއެވެ.
އެގޮތުން ޞަދަގާތް ކުރުމުގެ އެންމެ މޮޅު އިތުރު ގޮތަކީ ސިއްރުން ސަދަގާތް ކުރުން ކަމަށާއި، ދެއްކުންތެރިކަމަށް ސަދަގާތް ކުރުމަކީ އަޒާބު ލިބެނިވި ކަމެއް ކަމަށް ވެސް މިއަދުގެ ހުކުރު ހުތުބާގައި ބުނެފައިވެއެވެ.ހަމައެހެންމެ އިހްލާސްތެރި ކަމެއް ނެތި، ކުރާ ޞަދަޤާތަކީ ބާތިލު ޞަދަޤާތެެއް ކަމަށާއި އިހުލާސްތެރިކަމެއް ނެތި ރަން ފަރުބަދައެއް ސަދަގާތް ކުރިޔަސް އެއީ އަގެއް ހުރި ޞަދަޤާތެއް ނޫން ކަމަށް މިއަދު ޚުތުބާގައި ބުނެފައިވެއެވެެ.
އެހެން ކަމުން ތިބާ ޞަދަޤާތް ކުރުމުގައި އިޚްލާޞްތެރި ވާން ޖެހޭ ކަމަށާއި އެހެނީ އިޚްލާޞްތެރިވުމަކީ ކޮންމެ ހެޔޮ ޢަމަލެއްގެ ތަނބުކަމަށް ވެސް ޚުތުބާގައި ބުނެފައިވެއެވެ. އަދި އިހުލާސްތެރިކަމެއް ނެތި ކުރެވޭ ސަދަގާތަކީ އެއްވެސް އަގެއް ހުރި އަމަލެއް ނޫންކަމަށާއި އެ އަމަލު ވާހުށީ ބާތިލު އަމަލެއް ކަމުގައި ހުތުބާގައި ބުންޏެވެ.
ގިޔާމަތް ދުވަހު ނަރަކައަށް އެއްލާލެވޭ ތިން ބާވަތެއްގެ މީހުންގެ ތެރޭގައި ދެއްކުންތެރިކަމަށް ސަދަގާތް ކުރާ މީހުން ހިމެނޭ ކަމަށް ބަޔާންކޮށްފައިވާ ގުދުސީ ހަދީސެއްވެސް ހުތުބާގައި ފާހަގަކުރިއެވެ.
ހުތުބާގައި ބުނި ގޮތުގައި، ސަދަގާތް ދިނުމުގެ އެންމެ މޮޅު އިތުރު ގޮތަކީ ސިއްރުން ސަދަގާތް ކުރުމެވެ. ސިއްރުން ސަދަގާތް ކުރުމަށް މާތްﷲގެ ހަޟްރަތުގައި ހާއްސަ މަގާމެއް ދެވިގެންވާކަމަށްވެސް ބުނެފައިވެއެވެ.
ހުތުބާގައި ބުނެފައި ވަނީ ﷲގެ މަގުގައި ހޭދަ ކުރުމަކީ އެކަލާނގެ ރުހުން ލިބި ގިނަ ސަވާބު ލިބޭ ކަމެއް ކަމަށެވެ. އަދި އެއީ ވަކި މީހަކަށް ހާއްސަކަމެއް ނޫން ކަމަށާއި އެންމެނަށްވެސް ކުރެވޭނެ އަޅުކަމެއް ކަމަށް ހުތުބާގައި ބުންޏެވެ.
ސިއްރުން ޞަދަޤާތްކުރުމުގެ މުހިއްމުކަން ބަޔާންކޮށް ޚުތުބާގައި ވިދާޅުވީ ޞަދަޤާތް ދިނުމަކީ ސިއްރާއި ފާޅުގައި ވެސް ކުރެވިދާނެކަމެކެވެ. ނަމަވެސް މީގެ ތެރެއިން އެންމެ މޮޅު އިތުރު ގޮތަކީ، ސިއްރުން ޞަދަޤާތް ކުރުމެވެ. ޞައްޙަ ޙަދީޘުން އެނގެން އޮތް ގޮތުގައި، ސިއްރުން ﷲ ތަޢާލާ އަށް އަދާކުރެވޭ އަޅުކަމަށް ޚާއްޞަ މަޤާމެއް އެކަލާނގެ ދެއްވާފައި ވެއެވެ.
މުދަލަކީ އިމްތިހާނެއް ކަމަށާއި މުދަލަށް ލޯބި ކުރުމަކީ އިންސާނާގެ ފިތުރަތުގައިވާ ކަމެއް ޚުތުބާގައި ބުނެފައިވާއިރު، އެއީ ވަގުތީ އުފަލެއް ދީ ފަނާވެދާ އެއްޗެއްކަން ވެސް ޚުތުބާގައި ފާހަގަކޮށްފައިވެއެވެ.
ސަދަގާތް ކުރުމަކީ މަރުވުމަށް ފަހުގައިވެސް އޭގެ ސަވާބު ލިބޭ ކަމެއް ކަމަށާއި އެގޮތުން ދޫކޮށްފައި ދިޔަ އިލްމަކުންނާއި، ތިމާއަށްޓަކައި ހެޔޮ ދުއާ ކުރާ ދަރީންނާއި ދެމިގެންވާ ސަދަގާތުން ތިމާ މަރުވުމަށްފަހުގައިވެސް ސަވާބު ލިބިލިބި ހުންނާނެ ކަމަށް ރަސޫލާ (ސއވ) ހަދީސް ކުރައްވާފައިވާ ބަސްފުޅެއް އެކަމުގެ ދަލީލެއްގެ ގޮތުގައި ޚުތުބާގައި ބަޔާން ކުރިއެވެ.
