އަބުރާ ބެހިގެން ވަޒީފާއިން ވަކިކުރީ އޮޅުމަކުން ކަމަށް ބުނީ މައްސަލަ ހޫނުވުމުންތޯ: ސައީދު
ރައީސް އިބްރާހީމް މުހައްމަދު ސޯލިހާއި ރައްޔިތުންގެ މަޖިލީހުގެ ރައީސް މުހައްމަދު ނަޝީދަށް މީސް މީޑިއާގައި ފާޑުކިޔާފައިވާ ކަމަށް ބުނެ ހިތަދޫ ޕޯޓް ލިމިޓެޑް (އެޗްޕީއެލް) ގެ މުވައްޒަފަކު ވަޒީފާއިން ވަކިކުރީ އިދާރީ އޮޅުމަކަށް ބުނީ މައްސަލަ ހޫނުވުމުންތޯ އައްސަވައި، މާވަށު ދާއިރާގެ މެމްބަރު އަދި ކުރީގެ އިކޮނޮމިކް މިނިސްޓަރު މުހައްމަދު ސައީދު ސުވާލު އުފައްދަވައިފި އެވެ.
ރައީސަށާއި މަޖިލީހުގެ ރައީސަށް ތަކުރާރުކޮށް ފާޑުކިޔައި އެ ދެ ބޭފުޅުންގެ އަބުރާ ބެހުނު ކަމަށް ބުނެ، އެޗްޕީއެލްގެ އެސިސްޓެން އޮޕަރޭޝަން އޮފިސަރު ވަޒީފާ އިން ވަކިކުރީ މިދިޔަ އަންގާރަ ދުވަހު އެވެ.
އެމައްސަލަ ހޫނުވެފައި ވަނިކޮށް އެމްޕީއެލްގެ މެނޭޖިން ޑިރެކްޓަރު ޝާހިދު އަލީ ވަނީ ރައީސް ސޯލިހާއި ރައީސް ނަޝީދަށް މީސް މީޑިއާގައި ފާޑުކިޔާފައިވާ ކަމަށް ބުނެ ހިތަދޫ ޕޯޓް ލިމިޓެޑްގެ މުވައްޒަފަކު ވަޒީފާއިން ވަކިކޮށްފައިވާ ކަމަށް އަންގާ ޗިޓް ފޮނުވުނީ އިދާރީ އޮޅުމަކުން ކަމަށް ވިދާޅުވެފަ އެވެ.
އެކަމާ ގުޅިގެން ސައީދު ސުވާލު އުފައްދަވައި ޓްވީޓް ކުރައްވައި ވިދާޅުވީ އެމައްސަލަ އިދާރީ އުޅުމަކަށް ވީ ހޫނުވުމުންތޯ އާއި ނޫންނަމަ ޑިމޮކްރަސީގެ ޗެމްޕިޔަނުން ކަމަށް ހެދި ތިބެ ހިންގާ ލާއިންސާނީ ކަންކަމުގެ ސަބަބުން، ރައްޔިތުންގެ ކުރިމަތީ ގެއްލޭ އިތުބާރު ފެނި އަތުންފައިން ގޯސް ހެދެނީތޯ އެވެ.
ޝާހިދު ވިދާޅުވީ އެ މުވައްޒަފު ވަޒީފާއިން ވަކިކުރަން ފޮނުވި ފުރަަތަމަ ޗިޓްގައި ދެ ރައީސުންގެ ވާހަކަ ހިމެނިފައިވަނީ އިދާރީ އޮޅުމެއްގެ ތެރެއިން ކަމަށާއި އެކަން ފަހުން އިސްލާހުކޮށްފައިވާނެ ކަމަށެވެ. އަދި އެ މީހާ ވަޒީފާއިން ވަކިކުރީ ކޯޑް އޮފް ކޮންޑަކްޓް ޕޮލިސީއާ ހިލާފުވުމުން ކަމަށް ޝާހިދު ވިދާޅުވިއެވެ.
ޝާހިދު ވިދާޅުވީ މުވައްޒިފަކަށް ފެންނަ ހިޔާލެއް ފާޅުކޮށްގެން ވަޒީފާއިން ވަކިނުކުރާނެ ކަމަށާ އެޗްޕީއެލްއިން ވަޒީފާއިން ވަކިކުރި ޒުވާނާއާ އޭނާ ފާޅުކުރި ހިޔާލަކާއި ގުޅުމެއް ނެތް ކަމަށެވެ.
މީގެ އިތުރުން މި ސަރުކާރަށް ފާޑު ކިޔައިގެން ވަޒީފާއިން ސަސްޕެންޑް ކުރި ޕްރިންސިޕަލެއްގެ މައްްސަލަ ވެސް ވަނީ ފެންމަތިވެފަ އެވެ. އޭނާ ފޭސްބުކްގައި ކޮށްފައިވާ ޕޯސްޓެއްގައި ބުނެފައިވާ 10 އަހަރު ތައުލީމީ ދާއިރާގައި ހޭދަކުރެވުނު އިރު އެއްވެސް ކަމެއް ރަނގަޅު ކުރަން ސިވިލް ސާވިސްގެ އޮނިގަނޑުގެ ތެރެއިން އަންގާފައި ނުވާ ކަމަށާއި ނަމަވެސް އެޑިއުކޭޝަން މިނިސްޓްރީގެ ޕީއެސްގެ "ފައިންޕުޅު" ދެކިލަން ގެންގޮސް ސަސްޕެންޑު ކުރީ ކަމަށެވެ.
