ނަޝީދުގެ އެންގެވުމަށް ޝިޔާމް އާއި ހުސެން އަށް ދިނީ ޓެރަރިޒަމްގެ ހަމަލާއެއް: ޖަމީލް
ރައްޔިތުންގެ މަޖިލީހުގެ ރައީސް މުހައްމަދު ނަޝީދުގެ އެންގުމަށް، ނައިފަރު ދާއިރާގެ މެމްބަރު އަހުމަދު ޝިޔާމް އާއި ފަރެސްމާތޮޑާ ދާއިރާގެ މެމްބަރު ހުސެން މުހައްމަދު ލަތީފް އަށް މަޖިލީހުގައި ދިން ހަމަލާތަކަކީ ޓެރަރިޒަމްގެ ހަމަލާތަކެއް ގޮތުގައި ކުރީގެ ނައިބު ރައީސް، ޑރ. މުހައްމަދު ޖަމީލު އަހުމަދު ސިފަ ކުރައްވައިފިއެވެ.
މި މަހުގެ ދެވަނަ ދުވަހުގެ ރޭ ދަންވަރު 1:30 ގައި ބޭއްވި ޖަލްސާގައި ގާނޫނު އަސާސީއަށް ގެންނަ އިސްލާހުގެ މަސައްކަތް އިދިކޮޅު ކޯލިޝަނުން ލަސް ކުރީ ކަމަށް ވިދާޅުވެ މަޖިލީހުގެ ރައީސް ނަޝީދު ވާހަކަދެއްކެވުމުން ނައިފަރު ދާއިރާގެ މެމްބަރު އަހުމަދު ޝިޔާމް ވަނީ ޖަލްސާގައި އަޑުގަދަ ކުރައްވާފައެވެ. އެއާއެކު ރައީސް މުހައްމަދު ނަޝީދު ވަނީ ޝިޔާމްގެ ނަން އިއްވާ މަޖިލީހުގެ ތަޅުން ދޫކުރައްވާ ވަޑައިގަތުމަށް އަންގަވާފައެވެ.
ނަމަވެސް އެކަމަށް ޝިޔާމް ދެކޮޅު ހެދުމުން އެމްޑީޕީ މެމްބަރުން އޭނާ ތަޅުމުން ނެރެން މަސައްކަތް ކޮށް އެ މެމްބަރުންނާ ދެމެދު ކޮންމެވެސް ވަރެއްގެ ކުރިމަތިލުންތަކެއް ހިނގާ ޝިޔާމަށް ވަނީ އަނިޔާ ވެފައެވެ. އަނިޔާތަކާއެކު ޝިޔާމް ވަނީ ހޮސްޕިޓަލަށް ގޮސް ފަރުވާވެސް ހޯދާފައެވެ.
މީގެ އިތުރުން އެ ޖަލްސާގައި ހިނގި ހަމަނުޖެހުމުގައި މަޖިލީހުގެ ނައިބު ރައީސް އީވާ، މެމްބަރު ހުސެއިންގެ ގައިކޮޅުގައި ފައިކުރުކޮށް ކޮޅުފައިން ޖެހި މައްސަލައެއް ވެސް ވަނީ ފެންމަތިވެފައެވެ.
އެކަމާ ގުޅިގެން ޖަމީލު ކުރެއްވި ޓްވީޓެއްގައި ވިދާވީ ނަޝީދު ގައުމުން ބޭރަށް އަރުވާލެވުނު އިރު އޭނާ އާއި އެކު މަސައްކަތް ކުރި މީހެއްގެ ހައިސިއްޔަތުން މިކަމާ އޭނާ ވަރަށް ލަދު ގަންނަ ކަމަށެވެ. އަދި ދުނިޔެ އިން "ރައިޓްސް ޗެމްޕިއަން" އޭ ކިޔާ މީހާގެ ހަގީގީ ސިފަ މުޅި ދުނިޔެއަށް ވެސް މިހާރު ފެންނަން ޖެހޭ ކަމަށް ޖަމީލު ވަނީ ވިދާޅުވެފަ އެވެ.
Act of terrorism on opposition MPs @Shiyamaldives & Hussein by ruling party MPs on Speaker @MohamedNasheed’s orders. As someone who worked with him in exile, I’m ashamed. World should know the so-called rights champion’s true face. @UNHumanRights @USAmbSLM @amnesty @EU_Maldives pic.twitter.com/BPcGwAZVAC
— Mohamed Jameel Ahmed (@MJameelAhmed) June 4, 2020
ޕީޕީއެމުން ބުނި ގޮތުގައި އޭނާގެ މައިބަދަ އާއި މޭކަށިގަނޑުގައި ވަނީ ރެދެއް ލައިފަ އެވެ. އަދި ހަތަރު ހަފްތާއަށް އޭނާ ބެޑް ރެސްޓު ކުރަން ޑޮކްޓަރުން ލަފާދީފައިވާ ކަމަށް އެ ޕާޓީން ބުންޏެވެ.
މަޖިލީހުގެ ރައީސް މުހައްމަދު ނަޝީދު އަންގަވައިގެން ޝިޔާމަށް އަނިޔާ ކުރީ ކަމަށް ތުހުމަތުކޮށް އިދިކޮޅު ކޯލިޝަންގެ މެންބަރުން އެ ރޭގައި ފުލުސް އޮފީހަށް ވަޑައިގެންނެވި އެވެ. އަދި އެ މައްސަލަ ފުލުސް އޮފީހަށް ރިޕޯޓް ކުރި އެވެ.
އެ މައްސަލަ އެރޭ ފުލުހަށް ހުށަހެޅި އިރު ޖިނާއީ ތަހުގީގު ފެށިކަން ފުލުހުން ވަނީ މިރޭގެ ވަގުތެއްގައި ކަށަވަރުކޮށްދެއްވާފައެވެ.
