މަނާކޮށްފައިވަނިކޮށް ހިދުމަތް ދިނުމުން މަޒާޑާ ކެފޭ ޖޫރިމަނާކޮށްފި
އެޗްޕީއޭގެ އެންގުމާ ހިލާފަށް ހިދުމަތް ދިނުމުން މަޒާޑާ ކެފޭ އާއި އެވަގުތު ހިދުމަތް ހޯދަމުން ދިޔަ ބަޔަކު ޖޫރިމަނާ ކޮށްފި އެވެ.
ފުލުހުން ބުނީ، މަޒާޑާ ކެފޭގައި ހިދުމަތް ދޭ ކަމަށް ބުނެ ލިބުނު މައުލޫމަތަކާ ގުޅިގެން އެ ކެފޭއަށް ގޮސް ބެލި ބެލުމުން، ލޮކްޑައުންގެ ހާލަތުގައި ބޭރުގައި އުޅޭއިިރު ނަގަންޖެހޭ ހުއްދަތައް ނުނަގައި ހިދުމަތް ހޯދަން ތިބި ހަތަރު މީހަކު ޖޫރިމަނާ ކޮށްފައިވާ ކަމަށެވެ. އަދި އެޗްޕީއޭގެ އެންގުމާ ހިލާފަަށް ހިދުމަތް ދިނުމުން މަޒާޑާ ކެފޭ ވެސް ޖޫރިމަނާކޮށްފައިވާ ކަމަށެވެ.
ކޮވިޑް-19އާ ގުޅިގެން ހޮޓާ، ކެފޭ އަދި ރެސްޓޯރަންޓްތަކުން ކާބޯތަކެތީގެ ހިދުމަތް ދިނުން ސަރުކާރުން ވަނީ މަނާ ކޮށްފަ އެވެ. އެ ތަންތަނުން މިހާރު ދެވޭނީ ޓޭކްއަވޭ އަދި ޑެލިވަރީގެ ހިދުމަތް އެކަންޏެވެ.
މީގެ ކުރިންވެސް ގަވާއިދާ ހިލާފްވެގެން ބައެއް ރެސްޓޯރަންޓްތައް ވަނީ ޖޫރިމަނާ ކޮށްފަ އެވެ. ގަވާއިދާ ހިލާފަށް ހިދުމަތް ދީފިނަމަ ފުރަތަމަ ފަހަރަށް ޖޫރިމަނާ ކުރަނީ 5000 ރުފިޔާއިންނެވެ.
