އެމްއެމްޕީއާރުސީގެ މައްސަލާގައި ދެން އެންމެ އަވަހަށް ދައުވާކުރާނެ މީހުން ކަނޑައަޅައިފި
އެމްއެމްޕީއާރުސީގެ ޚިޔާނާތުގެ މައްސަލާއާ ގުޅިގެން އެންމެ ފުރަތަމަ ދަޢުވާކުރަންޖެހޭ މީހުން މިހާރު ކަނޑައަޅާފައިވާކަމަށް ހޯމް މިނިސްޓަރ އިމްރާން ޢަބްދުﷲ ވިދާޅުވެއްޖެއެވެ.
ދައުލަތުގެ މީޑިއާ "ޕީއެސްއެމް"ގެ ޕްރޮގްރާމެއްގައި ރޭ ވާހަކަފުޅު ދައްކަވަމުން ހޯމް މިނިސްޓަރ އިމްރާން ޢަބްދުﷲ ވިދާޅުވީ، އެމްއެމްޕީއާރުސީގެ ޚިޔާނާތުގެ މައްސަލާގައި ފުލުހުން ހިންގި ތަޙްޤީޤަށް ބޮޑެތި ކުރިއެރުންތަކެއް މިހާރު ލިބިފައިވާކަމަށެވެ. އެގޮތުން މި މައްސަލާގައި އެކި ގޮތްގޮތުން ޝާމިލްވެ، ބައިވެރިވެފައި ތިބި މީހުންގެ ޢަދަދު މިހާރު ވަރަށް ބޮޑަށް ސާފުވެފައި ވާކަމަށް މިނިސްޓަރު ވިދާޅުވިއެވެ.
އިމްރާން ވިދާޅުވީ އެ ހިޔާނާތުން މަންފާ ލިބުނު މީހުންގެ އަދަދު 260 އަށް ވުރެން މަތި ކަމަށް ބެލެވޭއިރު، އޭގެތެރެއިން ތުހުމަތުކުރެވޭ މީހުންނަށް އެއް ފަހަރާ ދައުވާ ކުރުމަކީ ކުރެވޭނެ ކަމެއް ނޫން ކަމަށެވެ. އެހެންކަމުން ދައުވާ ކުރުމުގައި އެންމެ އިސްކަންދޭން ޖެހޭ މީހުން ތަރުތީބު ކުރުމުގެ މަސައްކަތް ކުރަމުން އަންނަ ކަމަށް ވިދާޅުވި އެވެ.
މިނިސްޓަރު ވިދާޅުވީ، އެމްއެމްޕީއާރުސީގެ ކޮރަޕްޝަންގެ މައްސަލަ ކުރިއަށްގެންދާނެ އޮނިގަނޑެއް މިހާރު އެކުލަވާލައި ނިމިފައިވާކަމަށެވެ. އަދި ކޮވިޑް-19 ގެ މި ހާލަތުގައިވެސް އެ ތަހުގީގަށް ފުރިަހަމަ ކުރަންޖެހޭ ކަންކަން ކުރިއަށްދާކަމަށާއި، ރާއްޖެއިން ބޭރުގެ ފަރާތްތަކުން ހޯދަންޖެހޭ މަޢުލޫމާތުވެސް މިހާރު އެއްކުރެވިފައި ވާކަމަށެވެ.
"މިހާރު ވަނީ ވަރަށް ހަރުދަނާ އުސޫލެއް އެކުލަވާލައިފައި. އެ އުސޫލުތަކުގެ ތެރެއިން ތަރުތީބު ވެގެން އެންމެ އަވަހަށް ދައުވާ ކުރަން ޖެހޭ ފަރާތްތައް ކަނޑައެޅި އެ ފަރާތްތަކަށް ދައުވާ ކުރުމުގެ ކަންކަން މިހާރު ދަނީ ތައްޔާރު ކުރެވެމުން. އަޅުގަނޑު ހިތުން ކޮވިޑް-19 ގެ މިދަތި ކަމުން އަރައިގަނެ އޯޕަން ވުމުގެ މަރުހަލާ ފެށިގެންދާއިރުގައި ކޯޓުތަކާ އެކުގައި އެކަންކަން ފެށިގެން ދާނެ،" މިނިސްޓަރު ވިދާޅުވި އެވެ.
އެމްއެމްޕީއާރުސީގެ ޚިޔާނާތުގެ ފައިސާ 267 ފަރާތަކަށް ލިބުނުކަމަށް އެ މައްސަލަ ތަހުގީގީ އިދާރާތަކުން ހާމަކޮށްފައިވާއިރު، ޚިޔާނާތުގެ ފައިސާ ލިބިފައިވާ ފަރާތްތަކުގެ ތެރޭގައި 18 ވަނަ ރައްޔިތުންގެ މަޖިލީހުގެ 44 މެމްބަރަކާއި، ރައްޔިތުންގެ މަޖިލީހުގެ މިހާރުގެ 16 މެމްބަރަކާއި، މިނިވަން މުވައްސަސާތަކުގައި އިސްކޮށް ތިއްބެވި ފަސް ބޭފުޅަކުވެސް ހިމެނިވަޑައިގަންނަވައެވެ. މީގެ އިތުރުން މިހާރު ސަރުކާރުގެ މަގާމުގައިތަކުގައި ތިބި ހަތް މީހަކާއި، ހަތް ފަނޑިޔާރެއްގެ އިތުރުން ސަލާމަތީ ބާރުތަކުގައި ހިމެނޭ 23 އޮފިސަރުން ވެސް ހިމެނެއެވެ.
