އެއްމާބަނޑު ދެކުދިން ނިޔާވީ ބަނޑަކަށް ނޫން، އެމަޖެންސީކޮށް ނެގި ފަހުން!
ދ. މީދޫ އަންހެނެއްގެ ބަނޑަށް އެއްމާބަނޑު ދެކުދިން ނިޔާވިކަމަށް ބުނެ ދެކެވެމުން އައި ވާހަކަ، ދ. އަތޮޅު (ކުޑަހުވަދޫ) ހޮސްޕިޓަލުން ދޮގުކޮށްފިއެވެ.
އެހޮސްޕިޓަލުގެ މެނޭޖަރ ތޯހިރު އަބްދުއްސައްތާރު "ދެން" އަށް މައުލޫމާތު ދެއްވަމުން ވިދާޅުވީ، ދެކުދިން ނިޔާވީ އަންހެންމީހާގެ ހާލަތު އެވަގުތު ހުރި ގޮތުން އެމަޖެންސީކޮށް ސިޒޭރިއަން އެއް ހަދާ ދެކުދިން ނެގި ފަހުން ކަމަށެވެ.
"ދ. މީދޫއިން އަޅުގަނޑުމެންނަށް ރިފަރ ކުރި ކޭސް އެއް އެއީ. ހޮސްޕިޓަލަށް އެމަޖެންސީގައި ގެނައިއިރު މާބަނޑު އަންހެންމީހާގެ ހާލު ވަރަށް ކްރިޓިކަލް، ބްލީޑް ވެސްވޭ، އެހެންވީމަ އެމަޖެންސީ ކޭސް އެއްވީމަ އަޅުގަނޑުމެންނަށް މަޖުބޫރުވާނެ މާބަނޑުމީހާ ފުރަތަމަ ސަލާމަތްކުރަން އުޅުން. އެހެންވެ ސީ-ސެކްޝަނަކަށް ދާން މިޖެހެނީ. އެހެންވެ ދެކުދިން ނެގީ. ފަސް މަހަކީ ގާތްގަނޑަކަށް 22 ނުވަތަ 23 ހަފްތާ. އެހެންވީމަ ޗާންސް ވަރަށް ކުޑަވާނެ ސަވައިވަލް. ދެން އަތޮޅު ހޮސްޕިޓަލުތަކުގައި އެފެސިލިޓީތަކެއް ނުހުރޭ. އައިޖީއެމްއެޗްގައި ވެސް އަޅުގަނޑަށް ހިއެއް ނުވޭ މާބޮޑު ޗާންސެއް އޮންނާނެހެން ސަވައިވަލް އަށް. އެއީ ކުދިން ވަރަށް ކުޑަވާނެ. ކުރީގަައި ވެއްޖިއްޔާ އެހާލަތުގައި އެބޯޝަން ހަދާނީ، ނަމަވެސް މިހާރު ސާޖިކަލް ފެސިލިޓީސް ހުންނާތީ ސާޖަރީހެދީ " ތޯހިރު ވިދާޅުވިއެވެ.
މީގެއިތުރުން ތޯހިރު ވިދާޅުވީ މިފަދަ ދުވަސްކޮޅެއްގައި އަތޮޅުތެރޭގެ ރަށަކުން މާލެއަށް ކުއްޖަކު ގެންދިޔުމަކީ ވެސް ފަސޭހަކަމެއް ނޫން ކަމަށާއި އެހެން ނަމަވެސް ފްލައިޓެއް ހަމަޖެއްސި ކަމަށާއި ނަމަވެސް ދެކުދިންގެ ހާލަތުހުރީ ފްލައިޓާއި ހަމައަށް ވެސް ގެންދެވޭ ގޮތަކަށް ނޫން ކަމަށެވެ.
"އަޅުގަނޑުމެން ފްލައިޓު ވެސް ގެނައިން. ކުއްޖެއްގެ ފުރާނަ ހުރިހާ ހިނދަކު ސަރުކާރުގެ ވިސްނުމަކީ ވެސް އެކުއްޖާގެ ފުރާނަ ސަލާމަތް ކުރެވޭތޯ ކުރެވެން ހުރި ހުރިހާ މަސައްކަތެއް ވެސް ކުރުން. އެގޮތުން ކުރެވެން ހުރި ހުރިހާ މަސައްކަތެއް ވެސް ކުރިން. ނަމަވެސް ފްލައިޓާއި ހަމައަށް ވެސް ގެންދެވޭފަދަ ގޮތަކަށް ނޫން ދެކުދިންގެ ހާލަތުހުރީ." ތޯހިރު ވިދާޅުވިއެވެ.
ދެކުދިންގެ ފުރާނަ ސަލާމަތްކުރަން ހޮސްޕިޓަލުން ކުރި މަސައްކަތުގައި، މާބަނޑު އަންހެންމީހާގެ އާއިލާއިން ވެސް ބައިވެރިވެފައިވާ ކަމަށާއި އާއިލާގެ ފަރާތުން އެއްވެސް ނުރުހުމެއް ފާޅުނުކުރާ ކަމަށް ވެސް ތޯހިރު ވިދާޅުވިއެވެ.
އެމަޖެންސީކޮށް ދެކުދިން ނަގާފައިވަނީ މިއަދު ހެނދުނު 8:30 ހާއިރު ގައެވެ. އަދި އެދެކުދިން ނިޔާވީ މިއަދު މެންދުރެއްހާއިރެވެ.
