ރައްކާ ރޯޑް ސޭފްޓީ ރަން 2021 ފަށައިފި
މޯލްޑިވްސް ޕޮލިސް ސާވިސްގެ ޓްރެފިކް މެނޭޖްމަންޓް ޑިޕާޓްމެންޓާއި އެލައިޑް އިންޝުއަރެންސް ކޮމްޕެނީ ގުޅިގެން ބާއްވާ ރައްކާ ރޯޑް ޝޯގެ މިއަހަރުގެ ފުރަތަމަ ހަރަކާތް ކަމުގައިވާ ރައްކާ ރޯޑްސޭފްޓީ ރަން 2021 މިއަދު ފަށައިއެވެ.
މިއަހަރުގެ ރައްކާ ރޯޑް ސޭފްޓީ ރަންގައި 800 އަށްވުރެ ގިނަ މީހުން ވަނީ ބައިވެރިވެފައެވެ. ރައްކާ ރޯޑް ޝޯ ކެމްޕެއިންއަކީ މަގުމަތީގެ ސަލާމަތާއި ރައްކާތެރި ކަމަށް ޢާއްމުން ހޭލުންތެރި ކުރުމަށް ސިލްސިލާކޮށް ބާއްވަމުން އަންނަ ކެމްޕެއިނެކެވެ.މި ކެމްޕެއިން އެންމެ ފުރަތަމަ ބާއްވާފައިވަނީ 2016 ވަނަ އަަހަރުގައެވެ.މިކެމްޕެއިންގައި ގިނަ ހަރަކާތްތައް ހިމެނޭއިރު މިފަހަރު ރައްކާ ކެމްޕެއިންގައި ޚާއްސަ ކަމެއްގެ ގޮތުން ކުރިއަށް ގެންދަނީ ވަރޗުއަލް ދުވުމެކެވެ.
ހުޅުމާލޭގައި މިއަދު ހަވީރު ބޭއްވި ރަސްމިއްޔާތެއްގައި މި ދުވުން ފައްޓަވައިދެއްވީ ހޯމް މިނިސްޓްރީގެ ސްޓޭޓް މިނިސްޓަރު އަލީ ނަޒީރެވެ. މިއަދު ފެށި ރައްކާ ރޯޑް ސޭފްޓީ ރަން ކުރިއަށް ގެންދިޔުމަށް ހަމަޖެހިފައިވަނީ މިމަހުގެ 16 ވަނަ ދުވަހުގެ ހަވީރު 6:00ގެ ނިޔަލަށެވެ.
މިއަހަރުގެ ރޯޑް ސޭފްޓީ ރަންއަށް ކަނޑައަޅާފައިވާ ޓެގަކީ، "މަގޭ ޒިންމާ އަމަލީ ގޮތުން ދެއްކުން" މިއެވެ.
