ސޯޝަލް މީޑިއާގައި ހިތުހުރިހާ އެއްޗެއް ލިޔުމަށްވުރެ ދީނީ ނަސޭޙަތެއް ޝެއަރކޮށްލުމުގެ ހެޔޮކަން ބޮޑު: ޢަބުދުއްރާޒިޤް
ޤަބޫލު ކުރިޔަސް ނުކުރިޔަސް ހައްޤުގެ ވާހަކަ ސޯޝަލް މީޑިއާގައި ހިއްސާކުރުމަކީ ގިނަ ފައިދާ ތަކެއް ކުރާނެ ކަމެއް ކަމަށާއި ޓެކްނޮލޮޖީ ވެސް ބޭނުން ކުރަންވީ ޙައްޤު ގޮތުގައި ކަމަށް ބޮޑުބެރުގެ ދާއިރާއިން ދިވެހިންގެ ތެރޭގައި މަޝްހޫރުކަން ހޯދި ޢަބުދުއްރާޒިޤް (ރާއްޓޭ) ބުނެފިއެވެ.
މީގެ އަހަރެއްހާ ދުވަސްކުރިން މިޔުޒިކާއި ދުރުވި ޢަބުދުއްރާޒިޤް ''ދެން''އާއި ވާހަކަ ދައްކަމުން ބުނީ މިޔުޒިކް ކުޅުން ހުއްޓާލުމާއި ގުޅިގެން އަދި އޭގެ ފަހުން އޭނާގެ ފޭސްބުކް ޕޭޖްގައި ހިއްސާކުރާ ދީނީ ނަސޭޙަތްތަކުގެ އިތުރުން ހެޔޮ އިރުޝާދުތަކާއި ގުޅިގެން އެކި މީހުންގެ ފާޑު ކިޔުންތައް އަމާޒުވާ ކަމަށެވެ. އެކަންކަމަކީ ދެއްކުންތެރިކަން ކަމުގައި ބައެއް ފަރާތްތަކުން ބުނަމުންދާ ކަމަށް ޢަބުދުއްރާޒިޤް ބުންޏެވެ.
އޭނާ ބުނީ އެންމެންގެ ޚިޔާލުތަކަށް ވެސް އިޙްތިރާމް ކުރާ ކަމަށާއި ނަމަވެސް ސޯޝަލް މީޑިއާގައި ހިތުހުރިހާ އެއްޗެއް ލިޔުމަށްވުރެ ދީނީ ނަސޭޙަތެއް ޝެއަރކޮށްލުމުގެ ހެޔޮކަން ބޮޑުވާނެ ކަމަށެވެ.
''ސޯޝަލް މީޑިއާގައި ހިތުހުރިހާ އެއްޗެއް ލިޔުމަށްވުރެ ދީނީ އެއްޗެއް ޝެއަރކޮށްލިޔަސް ފަހުން ވެސް ހަނދާންވެ އެހެން މީހަކަށް ވެސް ދެވެން އޮތް ނަސޭހަތަކަށް ފެންނަން އޮންނާނީ ތިމާ ބުނި އެއްޗެއް، އަދި ﷲ ސުބުހާނަހޫ ވަތަޢާލާގެ އިރާދަފުޅުން މީހަކު އިސްލާޙްވުމަށް މެދުވެރިވާ ސަބަބެއް ހިއްސާކުރި ޕޯސްޓަކަށް ވެސް ވެދާނެ" ޢަބުދުއްރާޒިޤް އޭނާގެ ފޭސްބުކް ޕޭޖްގައި ލިޔެފައިވެއެވެ.
ޢަބުދުއްރާޒިޤްއަކީ ރާއްޖޭގައި ބާއްވާ އެންމެ ބޮޑު ބޮޑުބެރު މުބާރާތުގެ އެއްވަނަ މަޤާމު ދެފަހަރު ހޯދާފައިވާ ފަންނާނެކެވެ. ނަމަވެސް މިޔުޒިކުން ލިބެމުން ދިޔަ ހިތްދަތިކަން ދޫކޮށް މީގެ އަހަރެއް ކުރިން އޭނާ ވަނީ މިޔުޒިކް އެއްކޮށް ދޫކޮށްލާފައެވެ. އޭނާގެ (މިވާހަކަތައް) މީގެ ކުރިން ''ދެން''އާއި ވަނީ ހިއްސާކޮށްފައެވެ. ޢަބުދުއްރާޒިޤް ބުނެފައިވަނީ އޭނާގެ މިހާރުގެ އެންމެ ބޮޑު އުއްމީދަކީ ޤުރުއާން ކިޔެވުމުގެ ރޮނގުން މަތީ ތަޢުލީމް ޙާޞިލްކޮށް މިސްކިތުގެ އިމާމްކަން ކުރުން ކަމަށެވެ.
