އެމްއެމްޕީއާރްސީގެ ހިޔާނާތުގައި ޝާމިލުވާ ފުލުހުން ސަސްޕެންޑު ކުރުމަށް ނަޝީދު ގޮވާލައްވައިފި
އެމްއެމްޕީއާރުސީގެ ބޮޑު ހިޔާނާތުގެ މައްސަލާގައި ތުހުމަތު ކުރެވޭ ފުލުހުންގެ އެބަތިބި ކަމަށާއި، އެފަދަ ފަރާތްތައް ސަސްޕެންޑްކޮށްގެން ނޫނީ ތަހުގީގުތައް ކުރިއަށް ގެންދަން އުނދަގޫވާނެ ކަމަށް މަޖިލީހުގެ ރައީސް، ރައީސް މުހައްމަދު ނަޝީދު ވިދާޅުވެއްޖެއެވެ.
ހެންވޭރު ހުޅަނގު ދާއިރާގެ މެމްބަރު ހަސަން ލަތީފު ހުށަހެޅުއްވި ފުލުހުންގެ ހިދުމަތުގެ ބިލާބެހޭ ގޮތުން ނަޝީދު މިއަދު ވިދާޅުވީ، ފުލުހުންގެ ބައެއް ތަހުގީގުތައް ރައްޔިތުންގެ މަޖިލީހުގެ ސަލާމަތީ ހިދުމަތްތަކާބެހޭ ކޮމިޓީން ބަލަމުން އަންނަ ކަމަށެވެ. އަދި އެމްއެމްޕީއާރްސީ މައްސަލާގައި ޝާމިލުވާ ފުލުހުން މަގާމުތަކުގައި އަދިވެސް އެބަ ތިބިކަން ފާހަގަކުރައްވާ ނަޝީދު ވަނީ ފުލުހުންގެ ތެރެއިން އެ މައްސަލަ އަށް ހުރަސް އަޅަމުން ގެންދާ ކަމަށް ވިދާޅުވެފައެވެ.
"ފުލުހުންގެ އޮފީހުގައި ވަައްކަމަށް ތުހުމަތު ކުރެވިފައި ތިއްބެވި ކުދިން މިހާރުން މިހާރަށްވެސް ސަސްޕެންޑް ކުރުން، ކޮށްފައި ނޫނިއްޔާ ވަރަށް އުނދަގޫވާނެ ފުލުހުންގެ ތެރޭގައި ތަހުގީގެއް ކުރިޔަށް ގެންދަން،" ރައީސް ނަޝީދު ވިދާޅުވިއެވެ.
މާލޭގައި ހަރަކާތްތެރިވާ ގޭންގްތަކާ ވެސް ގާތް ގުޅުން އޮންނަ ފުލުހުން އުޅޭ ކަމަށް ވިދާޅުވި އެވެ. މިކަމާ މެދު މެންބަރުން ވިސްނަވަން ވެސް ނަޝީދު އިލްތިމާސް ކުރެއްވިއެވެ.
