މިއީ އެއް ޕާޓީ ގައުމެއް ނޫން، އިދިކޮޅު މެމްބަރުން މަޖިލީހަށް ވަޑައިގަންނަވާ: ނަޝީދު
އިދިކޮޅު ޕީޕީއެމް/ޕީއެންސީ މެމްބަރުން މަޖިލީހުގެ ޖަލްސާއަށް ވަޑައިގަތުމަށް މަޖިލީހުގެ ރައީސް، ރައީސް މުހައްމަދު ނަޝީދު އެދިވަޑައިގެންފިއެވެ،
ޕްރޮގްރެސިވް ކޯލިޝަނުގެ ޖޮއިންޓް ޕާލަމެންޓްރީ ގްރޫޕްގެ ފަރާތުން ރޭ ނެރުނު ބަޔާނެއްގައި ބުނެފައިވަނީ މި މަހުގެ ދެވަނަ ދުވަހުގެރޭ ބޭއްވި ޖަލްސާގައި މަޖިލީހުގެ ރައީސް، މުހައްމަދު ނަޝީދު އެމްޑީޕީގެ މެމްބަރުން ލައްވާ ނައިފަރު ދާއިރާގެ ޕީޕީއެމް މެމްބަރު އަހުމަދު ޝިޔާމް އަށް އަނިޔާކޮށް، އިދިކޮޅު މެމްބަރުން ތަޅުމުން ބޭރުކޮށް މަޖިލީހުގެ ދޮރުތަޅުލާފައިވާ ކަމަށެވެ.
އަދި މަޖިލީހުގައި އިދިކޮޅު މެމްބަރުންނަށް ސަލާމަތާއި ރައްކާތެރިކަމާއެކު، ގާނޫނީ ޒިންމާ އަދާކުރެވޭނެ މާހައުލެއް އޮތް ކަމަށް ނުފެންނަ ކަމަށާއި އެރޭގެ ޖަލްސާގައި ލިބުނު އަނިޔާތަކުގެ ސަބަބުން މެމްބަރު ޝިޔާމުގެ ސިއްހީ ހާލުކޮޅު ގޯސްވެފައިވާތީ އާއި އެކަމާ ގުޅޭ ޖިނާއީ ތަހުގީގެއް ހިނގަމުންދާތީ އިދިކޮޅު މެމްބަރުން މަޖިލީހުގެ މިއަދު ޖަލްސާގައި ވެސް ބައިވެރި ނުވާނެ ކަމަށް ބުނެފައިވެއެވެ.
މިއަދު މަޖިލީހުގެ ޖަލްސާ ފައްޓަވަމުން ވާހަކަ ދައްކަވަމުން ރައީސް ނަޝީދު ވިދާޅުވީ އެމަނިކުފާނު މަޖިލިސް ހިންގަން ބޭނުން ވަނީ މައިނޯރިޓީ ޕާޓީތަކާ އެކުގައި، އެ ޕާޓީތަކަށް ހުރިހާ ހައްގަކާއި ބާރުތަކެއް ލިބިދޭ ނިޒާމެއްގެ ތެރެއިން ކަމަށެވެ. އެހެންކަމުން ޕީޕީއެމް-ޕީއެންސީގެ މެމްބަރުން މަޖިލީހަށް ވަޑައިގަތުމަށް އެ މަނިކުފާނު ވަނީ އެދިވަޑައިގެންފައެވެ.
"އަޅުގަނޑު ހާއްސަ ކޮށް ޕީޕީއެމާއި ޕީއެންސީގެ މެންބަރުންނަށް ދަންނަވާލަން މަޖިލީހަށް ވަޑައިގަތުމަށް. އެ ބޭފުޅުން މަޖިލީހަށް ވަޑައި ނުގަތުމުން، ގޮނޑީގެ އަދަދުން އޭގެ އުސްމިން އަދި ފާހަގަ ނުކުރެވުނަސް މުޅި ސިޔާސީ ނިޒާމަކީ ވާދަވެރިންނާ އެކީގައި ހިންގަން ޖެހޭ ނިޒާމެއް." ރައީސް ނަޝީދު ވިދާޅުވި އެވެ.
ނަޝީދު މިއަދު ވިދާޅުވީ ވާދަވެރިކަމާ އެކު މަސައްކަތްކުރުން ރާއްޖެ އަށް ކޮންމެހެން ބޭނުންވާ ކަމަށާއި ރާއްޖޭގައި މަލްޓި ޕާޓީ ސިޔާސީ ޑިމޮކްރަސީ ތައާރަފްކުރި ފަހުން ރާއްޖޭގެ ރައްޔިތުންގެ ޖުމްލަ ޕޮޕިއުލާ ވޯޓް އެއް ޕާޓީއަކަށް ރައްޔިތުން ދީފައިނުވާ ކަަމަށެވެ.
