އިންޓަނެޓް އަގުހެޔޮ ކުރެވޭނެ ތާރީހެއް 30 ދުވަހުގެ ތެރޭގައި މަޖިލީހަށް އަންގަން ފާސްކޮށްފި
އިންޓަނެޓް އަގުހެޔޮކުރެވޭނެ ތާރީހެއް 30 ދުވަހުގެ ތެރޭގައި ކަމާބެހޭ ފަރާތްތަކުން މަޖިލީހަށް ހުށަހަޅަން މިއަދުގެ ޖަލްސާގައި ފާސްކޮށްފި އެވެ.
މަޖިލީހުން މިގޮތަށް ފާސްކުރީ، ރަށުގެ އުފެއްދުންތަކާއި ވިޔަފާރިތައް ރަށު ބަންދުން މިނިވަންކޮށް، ޒަމާނީ ތަރައްގީ ގެނުވައިދިނުމަށް ގޮވާލައި، ރައްޔިތުންގެ މަޖިލީހުގެ މާފަންނު މެދު ދާއިރާގެ މެންބަރު އިބްރާހިމް ރަޝީދު (ބޮންޑާ) މަޖިލީހަށް ހުށަހެޅުއްވި ގަރާރުގައި ހިމަނައިގެންނެވެ.
މި ގަރާރުގައި ހިދުމަތުގެ ފެންވަރު ރަނގަޅު ކުރުމާބެހޭ ޓެކްނިކަލް ރިޕޯޓަކާއި، ކްރޮސްވޯޑް އީކޮމާސް ގާއިމްކުރުވޭނެ މުއްދަތުވެސް 30 ދުވަހުގެ ތެރޭގައި މަޖިލީހަށް އަންގަން ވަނީ ފާސްކޮށްފަ އެވެ.
ބޮންޑާ ހުށަހެޅުއްވި ގަރާރުގައި ވަނީ މި ރިޕޯޓް މަޖިލީހުން ފާސްކުރާތާ 30 ދުވަހުގެ ތެރޭގައި އިންޓަނޭޝަނަލް ޕޭމަންޓް ގޭޓްވޭ ނުވަތަ ކްރޮސްވޯޑާ އީކޮމާސް ރާއްޖޭގައި ފެއްޓޭނެ ކަމަށް ލަފާކުރެވޭ ތާރީހާއި އެ މަސައްކަަތަށް ހޭދަވާނެ ވަގުތު އަންގައިދޭ ތާވަލެއް އެމްއެމްއޭއިން އެކުލަވާއި މަޖިލީހަށް ހުށަހަޅަންވާނެ ކަމަށެވެ.
ފައިބަރު އޮޕްޓިކަލް ކޭބަލް ގުޅާލާފައިވާ ރަށްރަށާއި އެ ރަށްރަށަށް ދީފައިވާ ފައިބަރު ކަނެކްޝަންގެ މައުލޫމާތުވެސް ހިމަނަން ވާނެ ކަމަށެވެ. އަދި ފައިބަރު ކަނެކްޝަންގެ ހިދުމަތް ގާއިމްކޮށްފައި ނުވާ ރަށްރަށުގެ ތަފްސީލާއި އެރަށްތަކުގައި ފައިބަރު ކަނެކްޝަންގެ ހިދުމަތް ދެމުން ނުދާ ސަބަބު ބަޔާންކޮށް ރިޕޯޓެއް ހުށަހަޅަންވާނެ ކަމަށެވެ.
ގަރާރުގައި ވަނީ އެކި ރަށްރަށަށް ފައިބަރު ކަނެކްޝަން ގުޅުމުގައި ބަލާ މިންގަނޑުތަކަކީ ކޮބައިތޯ އާއި ކޮމިއުނިކޭޝަން މިނިސްޓްރީން ކަނޑައަޅާފައިވާ ފައިބަރު ވިއުގައެއްގެ ގައުމީ ތަސައްވުރެއް ނުވަތަ ރެގިއުލޭޓަރީ ގަވާއިދެއް ވާނަމަ އެ މައުލޫމާތު ހިމެނުމަށެވެ. އަދި އެކަމަށް ސާވިސް ޕްރޮވައިޑާއެއް ވާނަމަ ރާއްޖޭގެ ހުރިިހާ ރަށްރަށަކަށް ފައިބަރި ކަނެކްޝަން ދެވޭނެ މުއްދަތެއްގެ ތަފްސީލްތަކާއި މަސައްކަތް ކުރިޔަށްދާނެ ގޮތުގެ ތާވަލެއް ހިމެނޭ ރިޕޯޓެއްވެސް ފަސްދުވަހުގެ ތެރޭގައި ހުށަހެޅުމަށް ގަރާރުގައިވެ އެވެ.
މީގެ އިތުރުން ގައުމީ ބިޒްނަސް-ޓު-ބިޒްނަސް އަދި ބިޒްނަސް-ޓު-ކޮންސިއުމާ ޕްލެޓްފޯމުގެ ނިޒާމެއް މިނިސްޓްރީ އޮފް އިކޮނޮމިކް ޑިވެލޮޕްމެންޓުގެ ލަފަޔާއި މަޝްވަރާއާއެކު މިނިސްޓްރީ އޮފް ކޮމިއުނިކޭޝަން ސައިންސް އެންޑް ޓެކްނޮލޮޖީގެ އިސްނެގުމުގެ ދަށުން ނޭޝަނަލް ސެންޓާ ފޯ އިންފޮމޭޝަން ޓެކްނޯލޮޖީ މެދުވެރިކޮށް ގާއިމްކޮށް، ތަރައްގީކުރުމަށްވެސް ހުށަހަޅާފައިވެ އެވެ.
އިންޓަނެޓްގެ އަގު ހެޔޮ ކޮށްދިނުމަކީ މި ސަރުކާރުގެ ވައުދެކެވެ. ނަމަވެސް އިންޓަނެޓްގެ އަގު ހެޔޮކުރުން ލަސްވެ، ރައްޔިތުންގެ ފާޑު ކިޔުން ވަނީ ސަރުކާރަށް އަމާޒުވެފަ އެވެ. ސަރުކާރުން އެންމެ ފަހުން ބުނެފައިވަނީ އިންޓަނެޓްގެ އަގު އެންމެ އަވަހަށްވެސް ހެޔޮކޮށް ދެވޭނީ 2023 ވަނަ އަހަރު ކަމަށެވެ.
