ކޮމެޓީ ހޫނުވެ، ބަރުލަމާނީ ނިޒާމެއް ގެންނަން އެމްޑީޕީ މެމްބަރަކު ގޮވާލައިފި
ސަރުކާރުގެ މަސްއޫލިއްޔަތު އަދާކުރާ މިންވަރު ބަލާ ކޮމެޓީއަށް އެންވަޔަރަންމަންޓް މިނިސްޓަރު ޑރ. ޙުސައިން ރަޝީދު ޙަސަން ހާޒިރުކުރި ބައްދަލުވުން ހޫނުވެ، ރާއްޖޭގައި ބަރުލަމާނީ ނިޒާމެއް ގާއިމް ކުރުމަށް ފުވައްމުލަކު ދެކުނު ދާއިރާގެ އެމްޑީޕީ މެމްބަރު މުހައްމަދު މުމްތާޒު ގޮވާލައްވައިފިއެވެ.
މިރޭ ކުރިއަށްދިޔަ ކޮމެޓީ ބައްދަލުވުމުގައި ވަރަށް ކޯފާ އިސްވެ ހުންނަވައި މުމްތާޒު ވިދާޅުވީ މިނިސްޓަރުންނަށް ރައްޔިތުންގެ އިހުސާސްތައް ނޭނގޭކަމަށާއި ބަރުލަމާނީ ނިޒާމު ގެންނަން ޖެހޭ ކަމަށެވެ.
"މިހާރު އެބަ ސުވާލު އުފެދޭ މިއީ އެންމެ ރަނގަޅު ނިޒާމުތޯ؟ ދިވެހިރާއްޖޭގެ ވެރިކަން ކުރާ ނިޒާމުގެ ވާހަކަ އަޅުގަނޑު މި ދައްކަނީ. ރައްޔިތުންގެ އިހްސާސްތައް ނޭނގޭ މިނިސްޓްރީތަކާއި މިނިސްޓަރުންތަކެއް ބައިތިއްބައިގެން އަޅުގަނޑުމެންނަކަށް ނޭނގޭ މިކަން ކުރާނެ ގޮތެއް. އަޅުގަނޑުމެންނަށް ރައްޔިތުން ގުޅަނީ. ރިޔާސީ ނިޒާމުގެ ބަދަލުގައި ބަރުލަމާނީ ނިޒާމެއް ގެންނަން ވެއްޖެކަން ނޭނގޭ." މުމްތާޒް ވިދާޅުވިއެވެ.
ޑރ. ޙުސައިން މިރޭ ކޮމިޓީއަސް ހާޒިރު ކުރީ ފުވައްމުލަކުގައި ގާއިމްކޮށްފައިވާ ފެނާއި ނަރުދަމާ ނިޒާމާ ގުޅޭގޮތުން ސުވާލު ކުރުމަށެވެ. މިނިސްޓަރުގެ އިތުރުން ފެނަކަ ކޯޕަރޭޝަންގެ މެނޭޖިން ޑިރެކްޓަރު އަހުމަދު ސައީދު ފުވައްމުލަކު ސިޓީ ކައުންސިލްގެ މޭޔަރު ވެސް ވަނީ ކޮމިޓީއަށް ހާޒިރު ކޮށްފައެވެ.
