މައްސަލަ ހޫނުވުމުން ޖީހާން އަށް ލިބުނު ގޯތި ދޫކޮށްލައިފި!
ރައްޔިތުންގެ މަޖިލީހުގެ ހިންނަވަރު ދާއިރާގެ މެންބަރު ޖީހާން މަހަމޫދަށް ލ. ގަމުން ލިބުނު ގޯތި ދޫކޮށްލައްވައިފިއެވެ.
އެމްޑީޕީއަށް ނިސްބަތްވާ މެންބަރު ޖީހާން އަކީ ޅ. ހިންނަވަރަށް އުފަން ބޭކަނބަލެކެވެ. އަދި އެކަމަނާގެ ފިރިކަލުންނަކީ ލ. ގަމުގެ ރައްވެއްސެކެވެ.
ނަމަވެސް ގަމުން ގޯތިލިބޭ މީހުންގެ ލިސްޓުގައި އެމްޕީ ޖީހާންގެ ނަން އޮތުމުގެ އިތުރުން، އެރަށުގަަައި ދިރިއުޅޭ ކަމަށް 10 ޕޮއިންޓު ވެސް ލިބިފައިވެއެވެ.
މިކަމާއި ގުޅިގެން އެތައް ބައެއްގެ ފާޑުކިޔުން ޖީހާން އަށާއި ސަރުކާރަށް ވެސް އަމާޒުވިއެވެ.
މިކަމާއި ގުޅޭގޮތުން އޮންލައިން ނޫހެއް ކަމަށްވާ "އަވަސް" އަށް މައުލޫމާތު ދެއްވަމުން މެންބަރު ޖީހާން ވިދާޅުވީ އޭނާއަކީ މާލޭގައި ވެސް އަދި ހިންނަރުގައި ވެސް ގޯއްޗެއް އޮތް މީހަކަށް ނުވާތީ، އޭނާގެ ފިރިމީހާގެ ރަށުން ގޯތި ދޫކުރަން ހުޅުވާލުމުން ފޯމު ހުށަހެޅުއްވީ ކަމަށެވެ.
"އެހެންވެ ގަމުން ރަށުން ބޭރު މީހުނަށް ދޫކުރާ ކެޓަގަރީން ގޯއްޗަށް އެދި ފޯމު ހުށަހަޅާފައިވާނީ، އަޅުގަނޑުގެ ދެ ކުދިންގެ ރަޖިސްޓްރީ ވެސް ގަމުގައި އޮންނާނީ، ދެ ކުދިންގެ މުސްތަގުބަލަށް ވިސްނާފައި ފޯމު ހުށަހެޅީ،" ޖީހާން ވިދާޅުވެފައިވެއެވެ.
މީގެއިތުރުން ޖީހާން ވިދާޅުވީ ގޯތި ލިބިވަޑައިގަތްކަން އެނގިވަޑައިގަތީ ވެސް ނޫހެއްގައި ރިޕޯޓު ކޮށްފައި އޮތުމުން ކަމަށާއި ގޯތި ހޯދުމަށް އެއްވެސް ނުފޫޒެއް ބޭނުން ކޮށްފައިނުވާނެ ކަމަށެވެ.
މީގެ އިތުރުން ގަމުގައި ދިރިއުޅޭ ކަމަށް ޕޮއިންޓް ލިބިފައިވަނީ ކިހިނެއްކަން އެނގިވަޑައި ނުގަންނަވާ ކަމަށާއި އެކަން އޮޅުން ފިލުއްވަން ރަށު ކައުންސިލަށް ސިޓީ ފޮނުއްވާފައިވާނެ ކަމަށެވެ.
"އަޅުގަނޑަކަށް ނޭނގެ ގަމުގައި ދިރުއުޅޭ ކަމަށް ޕޮއިންޓް ލިބުނު ގޮތެއް، ދެން ގޯތި ދޫކުރުމުގައި ޕޮއިންޓް ދީފައިވާ އެ ނިޒާމާ ގުޅޭ ގޮތުން ގިނަ ބައެއްގެ ހިތުގައި ސުވާލު އުފެދިފައިވާތީ، އެ ގޮތަށް ލިބޭ ގޯއްޗެއް ބޭނުން ކުރަން އަޅުގަނޑު ބޭނުން ނުވީ، އެހެންވެ ގޯތި ދޫކޮށްލަން ބޭނުންވާ ކަމަށް ކައުންސިލަށް އަންގާފައިވާނީ،" ހިންނަވަރު ދާއިރާގެ މެންބަރު އެނޫހަށް މައުލޫމާތު ދެއްވަމުން ވިދާޅުވެފައިވެއެވެ.
Ads by STO
