11 އަހަރުގެ ކުއްޖާ ރޭޕްކުރި މީހާގެ ބަންދަށް 7 ދުވަސް ޖެހި މައްސަލަ އިސްތިޢުނާފް ކުރުމަށް ރިޔާޒު ގޮވާލައްވައިފި

މާލޭގެ ގެސްޓު ހައުސްއެއްގައި އުމުރުން 11 އަހަރުގެ ކުއްޖަކު ރޭޕްކުރި ކަމަށް ތުހުމަތު ކުރެވޭ މީހާގެ ބަންދަށް 7 ދުވަސް ޖެހި މައްސަލަ އިސްތިޢުނާފް ކުރުމަށް ތިމަރަފުށި ދާއިރާގެ މެމްބަރު އަބްދުﷲ ރިޔާޒު ގޮވާލައްވައިފިއެވެ.

Ads by Hajj Corporation

އެ ކުއްޖާ ރޭޕް ކުރި މައްސަލައެއްގައި އުމުރުން 38 އަހަރުގެ ދިވެހި ފިރިހެނަކު ވަނީ ހައްޔަރުކޮށްފަ އެވެ. ރޭޕްގެ ތުހުމަތުގައި ހައްޔަރުކޮށްފައި ވަނީ ހއ. ބާރަށު، ސިލްސިލާގޭ، އަނީސް ހިލްމީ އެވެ. ފުލުހުން ވަނީ އޭނާގެ ފޮޓޯ އާއި ވަނަވަރު އާންމު ކޮށްފައެވެ.

ފުލުހުންގެ ބުނީ މިމައްސަލައިގައި ހައްޔަރު ކުރެވުނު ފަރާތުގެ ބަންދާއިމެދު ގޮތެއް ނިންމުމަށް މިއަދު ކޯޓަށް ހާޒިރު ކުރުމުން، ހޯމް މިނިސްޓްރީން ކަނޑައަޅާ ތަނެއްގައި ބަންދުގައި ބަހައްޓައިގެން ތަހުގީގު ކުރިއަށް ގެންދިޔުމަށް ހަތް ދުވަހުގެ މުއްދަތެއް ދީފައިވާ ކަމަށެވެ.

މިކަމާ ގުޅިގެން ރިޔާޒު ކުރެއްވި ޓްވީޓެއްގައި ވިދާޅުވީ ކުޑަކުއްޖަކު ރޭޕްކުރިކަމުގެ ތުހުމަތުގަ ހައްޔަރުކުރިމީހާގެ ޝަރިޔަތް ނިމެންދެން ބަންދުގަ ބެހެއްޓުމަށް އެދި ފުލުހުންނާއި ޕީޖީއިން ހުށަހެޅުމުން 7 ދުވަހަށް މުއްދަތު ޖަހާފަވާ މަައްސަލަ އިސްތިޢުނާފް ކުރުމަށް އިލްތިމާސް ކުރާ ކަމަށެވެ.

"މިއީ ސީރިއަސް މައްސަލައެއް!" ރިޔާޒު ވިދާޅުވިއެވެ.

އަނީސް ހިލްމީ ޝަރީއަތް ނިމެންދެން ބަންދުގައި ބަހައްޓަދޭން ކޯޓަށް ހުށައަޅަން ޕްރޮސެކިއުޓަރ ޖެނެރަލްގެ އަރިހުން، ކޮމިޝަނަރ އޮފް ޕޮލިސް މުޙައްމަދު ޙަމީދު، ވަނީ އެދިވަޑައިގެންފައެވެ. މިއީ މިފަދަ މައްސަލަ އަކާއި ގުޅިގެން ވޭތުވެދިޔަ 5 އަހަރުތެރޭގައި މިފަދަ ނިންމުމަކަށް ޕީޖީ އޮފީހުގައި ފުލުހުން އެދުނު ފުރަތަމަ ފަހަރެވެ.

ނަމަވެސް އެ މީހާ ޝަރީއަތުގެ މަރުހަލާ ނިމެންދެން ބަންދުކޮށްދިނުމަށް އެދިފައި ވަނިކޮށް އެމީހާގެ ބަންދަށް ކޯޓުން 7 ދުވަސް ޖެހި ސަބަބާއި މެދު ގިނަބަޔަކު އަންނަނީ ސުވާލު އުފައްދަމުންނެވެ.