ސަމާލުވޭ! އިންޓަނެޓު މެދުވެރިކޮށް ކުދިން ގްރޫމްކުރުން އިތުރުވަނީ
އިންޓަނެޓު މެދުވެރިކޮށް ކުޑަކުދިން ގްރޫމު ކުރުން ރާއްޖޭގައި ވެސް ހިނގަމުން އަންނަ ކަމުގައި ޖެންޑާ މިނިސްޓަރު އާއިޝަތު މުހައްމަދު ދީދީ ވިދާޅުވެއްޖެއެވެ. މިނިސްޓަރު ވަނީ ބެލެނިވެރިން މި ކަމަށް ސަމާލުވުމަށް ވެސް އެދިފައެވެ.
ގްރޫމްކުރުމަކީ ކުޑަކުދިންނާއި ޢާއިލާއަށް ފައިސާއާއި އެހެނިހެން ތަކެތި ދީގެން ކުއްޖާއާއި ރަޙުމަތްތެރިކަން އުފައްދާ، ރުއްސުވައިގެން ޖިންސީ އެދުމެއް ޙާސިލުކުރުމަށް މަގުފަހިކުރުވުމެވެ.
މިނިސްޓަރު މިހެން ވިދާޅުވީ ކުރެއްވި ޓްވީޓެއްގައެވެ.
އެގޮތުން މިކަން ރާއްޖޭގައި ވެސް ހިނގާ ކަމަށާއި ބެލެނިވެރިންގެ ހައިސިއްޔަތުން، ކުދިންނަށް ފޯރުކޮށްދޭންޖެހޭ ރައްކާތެރިކަން ފޯރުކޮށް ދިނުމަށް މިނިސްޓަރު ވަނީ އިލްތިމާސް ކުރައްވައިފަ އެވެ. އަދި މިކަމުގެ ސަބަބުން މައުސޫމް ކުދިން ތަކެއް އޭގެ ދަލުގައި ޖެހިދާނެ ކަމަށް މިނިސްޓަރު ވިދާޅުވިއެވެ.
މިފަދަ ކަމެއް ހިނގާ ކަމުގެ ޝައްކެއް ވެއްޖެނަމަ ފުލުހުންނަށް އެކަން ރިޕޯޓުކުރުމަށް ވެސް މިނިސްޓަރު އެދިފައެވެ.
މި މަހުގެ 10 ވަނަ ދުވަހު 11 އަހަރުގެ ކުޑަ އަންހެން ކުއްޖަކު އެގާރަ އަހަރުގެ ކުއްޖަކު ގްރޫމް ކޮށް ރޭޕްކުރި މައްސަލައިގައި ހއ.ބާރަށު ސިލްސިލާގޭ ޢުމުރުން 38 އަހަރުގެ އަނީސް ހިލްމީ ހައްޔަރުކޮށް އޭނާގެ ބަންދަށް ކްރިމިނަލް ކޯޓުންވަނީ 7 ދުވަސް ޖަހައިދީފައެވެ.
