ސުޝާންތު މަރުވުމުން ހިތާމަކުރާ ކަމަށް ބުނުމުން ކަރަން ޖޯހަރާއި އާލިއާ ބަޓް ހޫނު ފެނަށް
ބޮލީވުޑްގެ މަޝްހޫރު ތަރި ސުޝާންތު އިއްޔެ އަމިއްލައަށް މަރުވެފައިވާއިރު ގިނަ ބަޔަކު އަންނަނީ އެކަމާއި ގުޅިގެން ހިތާމަ ފާޅުކުރަމުންނެވެ. އޭގެ ތެރޭގައި ބޮލީވުޑުގެ މަޝްހޫރު ތަރިންނާއި ޑައިރެކްޓަރުން ވެސް ހިމެނެއެވެ.
ނަމަވެސް ގިނަ ފޭނުން ގަބޫލު ކުރާ ގޮތުގައި ސުޝާންތުގެ މަރާ ގުޅިގެން ހިތާމަކުރަމުން އަންނަ އެންމެނަކީ އޭނާ އަށް ހެޔޮ އެދިގެން އުޅުނު މީހުނެއް ނޫނެވެ.
އެގޮތުން އާލިއާ ބަޓް އާއި ކަރަން ޖޯހަރް ގެ ތައުޒިޔާ މެސެޖެއް ފަހު ފޭނުންވަނީ އެ ދެމީހުންނަށް ހޫނު ހަމަލާތަކެއް ދީފައެވެ.
ގިނަ ބަޔަކު ވަނީ އާލިއާ ބަޓް އާއި ކަރަން ޖޯހަރު "ކޮފީ ވިތް ކަރަން" ގައި ސުޝާންތު އަށް މަލާމާތް ކޮށް ހަނގާ ކުރި ހަނދާން އާ ކޮށްދީފައެވެ. އަދި އެދުވަހު އޭނާ އަކީ ޓީވީ ސީރިއަލް އަކުން ބޮލީވުޑަށް ނިކުތް މީހަކަށް ވުމުން މަލާމާތް ކޮށް ފުރައްސާރަ ކުރުމަށްފަހު މިއަދު އޭނާ މަރުވުމުން އެކަމާ ހިތާމެ ކުރާނެ ކަމެއް ނެތް ކަމަށް ގިނަ ބަޔަކު އަންނަނީ ބުނަމުންނެވެ.
ސުޝާންތު އަމިއްލަ އަށް މަރުވެފައިވަނީ އޭނާ ދިރިއުޅޭ އެޕާޓްމެންޓުގައި ދަންޖެހިގެންނެވެ. ރިޕޯޓުތައް ބުނާ ގޮތުގައި އޭނާ ކްލިކަލް ޑިޕްރެޝަން އަށް ފަރުވާ ހޯދަމުން އަންނަތާ ހަމަސް ވެއްޖެއެވެ. އަދި އޭނާ މަރުވީ ޑިޕްރެޝަން ގައި ކަމަށް ގިނަ ބަޔަކު އަންނަނީ ބުނަމުންނެވެ.
