ސްކޫލްތައް ހުޅުވުނަސް ޓެލިކިލާސްތައް ކުރިއަށް ގެންދާނެ: އެޑިއުކޭޝަން
އަންނަ މަހު ސްކޫލްތައް އަލުން ހުޅުވުމަށް ނިންމާފައިވީ ނަމަވެސް، ޓެލިކިލާސްތައް ހުއްޓާނުލާ ކުރިއަށް ގެންދިޔުމަށް ނިންމާފައިވާ ކަމަށް އެޑިއުކޭޝަން މިނިސްޓްރީން ބުނެފިއެވެ.
ދައުލަތުގެ މީޑިއާއަށް މައުލޫމާތު ދެމުން އެޑިއުކޭޝަން މިނިސްޓްރީގެ ސްޓޭޓް މިނިސްޓަރ ޑރ.އަބްދުﷲ ރަޝީދު ވިދާޅުވީ ޓެލިކިލާސްތަކަކީ، މެދު ނުކެނޑި ކުރިއަށް ގެންދާ އެއްޗެއްގެ ގޮތަށް ހެދުމަށް އެމިނިސްޓްރީން ނިންމާފައިވާ ކަމަށާއި އެހެން ނަމަވެސް ދަރިވަރުން ސްކޫލްތަކަށް ގޮސް ކިޔަވަން ފެށުމުން ޓެލި ކިލާސްތައް ކުރިއަށް ގެންދާ މިންވަރު މަދުވާނެކަމަށެވެ.
ނަމަވެސް ވީހާވެސް ބޮޑަށް މުދައްރިސުންނަށް ފަސޭހަވާނެގޮތަށް ކިލާސްތައް ކުރިއަށް ގެންދިޔުމަށް ނިންމާފައިވާކަމަށް ވެސް ޑރ. އަބަދުﷲ ވިދާޅުވިއެވެ.
މީގެއިތުރުން ސްޓޭޓް މިނިސްޓަރ ވިދާޅުވީ ޓެލިކިލާސްތަކުގެ ސަބަބުން، މުދައްރިސުން ކިޔަވާ ދެމުންދާ ގޮތް މުޅި ރާއްޖެއަށް ފެންނަމުންދާ ކަމަށާއި އެހެންކަމުން އެއީ ވަރަށް މުހިންމު ކަމެއް ކަމަށެވެ.
"500 އަށް ވުރެ ގިނަ މުދައްރިސުންގެ ކިޔަވައިދޭ ގޮތް ފެނިގެން އެބަދޭ. އެމީހުންގެ ކޮންފިޑެންސްވެސް އިތުރުވޭ އެބަ. މި ކްލާސްތަކަސް ބެލެނިވެރިންގެ ފަރާތުންވެސް ލިބެމުންދަނީ ޕްޒިޓިވް ކޮމެންޓް." އެޑިއުކޭޝަން މިނިސްޓްރީގެ ސްޓޭޓް މިނިސްޓަރ ޑރ.އަބްދުﷲ ރަޝީދު ވިދާޅުވެފައިވެއެވެ.
