ރައްޔިތުންގެ މަޖިލީހުގެ މެމްބަރަކު ފުލުހުންނާ ބެހޭ ގޮތުން ދައްކާ ވާހަކަތައް ރިޔާސަތުން ކޮންޓްރޯލް ނުކުރި ނަމަވެސް ފުލުހުންގެ ސަފުތަކެއް ނުރޫޅޭނެ ކަމަށް މަޖިލީހުގެ ކުރީގެ ނައިބް ރައީސް މުސާ މަނިކު ވިދާޅުވެއްޖެއެވެ.
Ads by Sosun Fihaara
ރައްޔިތުންގެ މަޖިލީހަށް ސަރުކާރުން ހުށަހަޅާފައިވާ ދިވެހި ފުލުހުންގެ ހިދުމަތުގެ ބިލަށް ބަހުސްކުރައްވަމުން، ގިނަ އެމްޑީޕީ މެމްބަރުން އަންނަނީ ފުލުހުންގެ ތެރޭގައި ކުށްކުރާ ފުލުހުން އުޅޭ ކަމަށާއި، އަދި ފުލުހުންގެ މައްސަލަތައް އެކަށީގެންވާ ގޮތެއްގައި ނުބެލޭ ކަމަށް ވިދާޅުވަމުންނެވެ. އަދި ފުލުހުންގެ ތެރޭގައި ތައުލީމީ ފެންވަރު ދަށް، ގާބިލު ނޫން އޮފިސަރުން ތިބި ކަމަށް ވެސް މެމްބަރުން އަންނަނީ ވިދާޅުވަމުންނެވެ.
މިކަމާ ގުޅޭގޮތުން މޫސަ ކުރެއްވި ޓްވީޓެއްގައި ވިދާޅުވީ މަޖިލިސް މެމްބަރުން ކޮންމެ ވާހަކައެއް ދެއްކި ނަމަވެސް ފުލުހުން ޤަދަރާއި އިޙްތިރާމްގައި އަބަދުވެސް ދެމިތިބޭނެ ކަމަށެވެ.
"ރައީސް ސޯލިހުގެ ފުރިހަމަ އަޣްލަބިއްޔަތު މަޖްލީހުގައި އޮތީ. އެތެރޭންނާ ބޭރުން ތެޅިޔަސް ކޮންމެ ފަހަރަކު ސަރުކާރެއް ނުވެއްޓޭނެ." މޫސަ ވިދާޅުވިއެވެ.
ފުލުހުންގެ ބިލަށް ރައްޔިތުން މަޖިލީހުގައި ބަހުސް ކޮށްފައިވާއިރު، ފުލުހުންނަށް މަޖިލިސް މެންބަރުންގެ ފަރާތުން ވަރަށް ބޮޑަށް ވަނީ ފާޑު ކިޔައިފަ އެވެ. އެ މައްސަލާގައި ފުލުހުންގެ ބައެއް އިސް މަގާމްތަކުގެ ބޭފުޅުން އެކަންކަމާ ގުޅޭ ގޮތުން ފުލުހުންގެ ދިފާއުގައި ޓުވީޓުތައް ވެސް ކުރި އެވެ.
އެގޮތުން ފުލުހުންގެ މުޅި މުއައްސަސާގެ އަގު ވެއްޓޭގޮތަށް، ބައެއް ފަރާތްތަކުން ތަކުރާރުކޮށް ވާހަކަދައްކަމުން ގެންދާތީ، އެކަމާމެދު ކޮމިޝަނާ އޮފް ޕޮލިސް، މުހައްމަދު ހަމީދު އާއި އެސިސްޓެންޓް ކޮމިޝަނާ އޮފް ޕޮލިސް ޑރ. އަބްދުﷲ ފައިރޫޝް ވެސް އިއްޔެ ވަނީ ކަންބޮޑުވުން ފާޅުކުރައްވައިފަ އެވެ.
