ފުލުހުން ރިފޯމް ކުރުމުގެ ބާރު މަޖިލީހަށް ދިނުމަށް ތާއިދެއް ނުކުރަން: ރިޔާޒު
ފުލުހުންގެ މުއަސަސާ ރިފޯމް ކުރުމުގެ ބާރު މަޖިލިހަށް ދިނުމަށް ތާއިދެއް ނުކުރާ ކަމަށް ތިމަރަފުށި ދާއިރާގެ މެމްބަރު އަބްދުﷲ ރިޔާޒު ވިދާޅުވެއްޖެއެވެ.
ރިޔާޒު މިހެން މި ވިދާޅުވީ ފުލުހުން މަގުމައްޗަށް ނެރެންވީ ސަރުދާރުންގެ ގޮތުގައި އަތަށް ކުދި ދަނޑިބުރި އެއް ދީފައި ކަމަށް މަޖިލީހުގެ މައްޗަންގޮޅި އުތުރު ދާއިރާގެ އެމްޑީޕީ މެމްބަރު މުހައްމަދު ރަޝީދު ވިދާޅުވުމާ ގުޅިގެންނެވެ.
މިކަމާ ގުޅިގެން ރިޔާޒު ކުރެއްވި ޓްވީޓެއްގައި ވިދާޅުވީ ފުލުހުން ރިފޯމް ކުރުމުގެ ނަމުގައި ވެރިކަން ހިންގާފަރާތައް ލިބިދޭ ބާރުތައް މަޖިލިހަށް ނެގުމަށް ތާއިދު ނުކުރާ ކަމަށެވެ.
"ފުލުހުން އަޅާނެ ޔުނިފޯމް އާއި ގެންގުޅޭނެ އާލާތްތައް ކަނޑައެޅުމަކީ ވެރިކަން ހިންގާފަރާތަށް އޮންނަންވާނެ ބާރެއްކަމަށް ދެކެން." ރިޔާޒު ވިދާޅުވިއެވެ.
ފުލުހުން ރިފޯރމް ކުރުމުގެ ނަމުގައި ވެރިކަން ހިންގާފަރާތައް ލިބިދޭ ބާރުތައް މަޖިލިހަށް ނެގުމަށް ތާއިދު ނުކުރަން. ފުލުހުން އަޅާނެ ޔުނިފޯރމް އާއި ގެންގުޅޭނެ އާލާތްތައް ކަނޑައެޅުމަކީ ވެރިކަން ހިންގާފަރާތަށް އޮންނަންވާނެ ބާރެއްކަމަށް ދެކެން. https://t.co/GhRb7DOFc9
— Abdulla Riyaz MP (@riyazabdulla) June 16, 2020
ރައްޔިތުންގެ މަޖިލީހަށް ސަރުކާރުން ހުށަހަޅާފައިވާ ދިވެހި ފުލުހުންގެ ހިދުމަތުގެ ބިލަށް ބަހުސްކުރައްވަމުން، ގިނަ އެމްޑީޕީ މެމްބަރުން އަންނަނީ ފުލުހުންގެ ތެރޭގައި ކުށްކުރާ ފުލުހުން އުޅޭ ކަމަށާއި، އަދި ފުލުހުންގެ މައްސަލަތައް އެކަށީގެންވާ ގޮތެއްގައި ނުބެލޭ ކަމަށް ވިދާޅުވަމުންނެވެ. އަދި ފުލުހުންގެ ތެރޭގައި ތައުލީމީ ފެންވަރު ދަށް، ގާބިލު ނޫން އޮފިސަރުން ތިބި ކަމަށް ވެސް މެމްބަރުން އަންނަނީ ވިދާޅުވަމުންނެވެ.
ފުލުހުންގެ ބިލަށް ރައްޔިތުން މަޖިލީހުގައި ބަހުސް ކޮށްފައިވާއިރު، ފުލުހުންނަށް މަޖިލިސް މެންބަރުންގެ ފަރާތުން ވަރަށް ބޮޑަށް ވަނީ ފާޑު ކިޔައިފަ އެވެ. އެ މައްސަލާގައި ފުލުހުންގެ ބައެއް އިސް މަގާމްތަކުގެ ބޭފުޅުން އެކަންކަމާ ގުޅޭ ގޮތުން ފުލުހުންގެ ދިފާއުގައި ޓުވީޓުތައް ވެސް ކުރި އެވެ.
އެގޮތުން ފުލުހުންގެ މުޅި މުއައްސަސާގެ އަގު ވެއްޓޭގޮތަށް، ބައެއް ފަރާތްތަކުން ތަކުރާރުކޮށް ވާހަކަދައްކަމުން ގެންދާތީ، އެކަމާމެދު ކޮމިޝަނާ އޮފް ޕޮލިސް، މުހައްމަދު ހަމީދު އާއި އެސިސްޓެންޓް ކޮމިޝަނާ އޮފް ޕޮލިސް ޑރ. އަބްދުﷲ ފައިރޫޝް ވެސް އިއްޔެ ވަނީ ކަންބޮޑުވުން ފާޅުކުރައްވައިފަ އެވެ.
