3 ފުލުހުން ވަޒީފާއިން ވަކިކުރީ އިންސާނީ ކަރާމަތަށް އުނިކަން ލިބޭފަދަ އަމަލުތައް ކޮށްފައިވާތީ: ފުލުހުން
ތިން ފުލުހަކު ވަޒީފާއިން ވަކިކޮށް އެއް ފުލުހެއްގެ މަގާމު ދަށް ކުރީ މީހަކަށް އަނިޔާކޮށް އިންސާނީ ކަރާމަތަށް އުނިކަން ލިބޭފަދަ އަމަލުތައް ކޮށްފައިވާތީ ކަމަށް ފުލުހުން ބުނެފިއެވެ.
ކޮމިޝަނަރ އޮފް ޕޮލިސް މުހައްމަދު ހަމީދު މިއަދު ކުރެއްވި ޓްވީޓެއްގައި ވިދާޅުވީ މިދިޔަ އަހަރުގެ އޮގަސްޓު މަހުގެ 5 ވަނަ ދުވަހު އާންމުގެ މީހަކަށް ހަމަލާދިން ތިން އޮފިސަރަކު ވަޒީފާއިން ވަކިކޮށް އެއް ފުލުހެއްގެ މަގާމު ދަށް ކުރުމަށް ފުލުހުންގެ ޑިސިޕްލިނަރީ ބޯޑުން އިއްޔެ ނިންމާފައިވާ ކަމަށެވެ.
އެކަން ހިނގާދިޔަ ގޮތުގެ ތަފްސީލު ހާމަކޮށް ފުލުހުން ބުނީ މައްސަލައެއްގެ ތުހުމަތުގައި ހޯދަމުން ދިޔަ މީހަކު، މަސްވެރިން ޕާރކް ސަރަހައްދުގައި ހުރި ސައިކަލެއް ވަގަށް ނަގަން އުޅޭ ކަމަށް ތުހުމަތުކުރެވިގެން ހުއްޓުވައި ފުލުހުންގެ ބެލުމުގެ ދަށަށް ގެނެއުމަށްފަހު، އެމީހާއަށް އަނިޔާކޮށް، އިންސާނީ ކަރާމަތަށް އުނިކަން ލިބޭފަދަ އަމަލުތައް ކޮށްފައިވާ ކަމަށެވެ.
އެ މައްސަލައަކާ ގުޅިގެން ފުލުހުންގެ ޕްރޮފެޝަނަލް ސްޓެންޑަރޑް ކޮމާންޑުން ކުރިއަށް ގެންދިޔަ އިންޓަރނަލް ތަހްޤީޤަށްފަހު ފުލުހުންގެ ޑިސިޕްލިނަރީ ބޯޑަށް ހުށަހެޅުމުން އެބޯޑުން އިއްޔެ އެގޮތަށް ނިންމުމުންނެވެ. އެގޮތުން ބޯޑުން ނިންމާފައވަނީ މައްސަލައިގެ ތުހުމަތުކުރެވޭ 4 ފުލުހުންގެ ތެރެއިން އެއްފުލުހަކު މަޤާމު ދަށް ކުމަށާއި އަދި އަދި އަނެއް 3 ފުލުހުން ވަޒީފާއިން ވަކިކުރުމަށެވެ.
ފުލުހުން ބުނީ ބޯޑުން ނިންމި ނިންމުން އިސްތިނާފު ކުރުމަށް ހުށަހެޅުމުގެ ފުރުޞަތު އިއްޔެއިން ފެށިގެން ރަސްމީ ބަންދުނޫން 7 ދުވަހުގެ ތެރޭގައި އެފުލުހުންނަށް ލިބިގެންވާ ކަމަށެވެ.
