2022 ވަނަ އަހަރުގެ ކުރިން މިނިމަމް ވޭޖް ކަނޑައެޅުން ރަނގަޅެ ނޫން: އަމީރު
ރާއްޖޭގެ އިގްތިސާދު މިއަހަރުގެ ކުރީކޮޅު އޮތް ހާލަތަށް ދާނީ 2022 ވަނަ އަހަރު ކަމަށް ލަފާކުރެވޭ ކަމަށާއި އެހެންކަމުން އޭގެ ކުރިން މިނިމަމް ވޭޖް ކަނޑައެޅުން ރަނގަޅެ ނޫން ކަމަށް ފިނޭންސް މިނިސްޓަރު އިބްރާހިމް އަމީރު ވިދާޅުވެއްޖެއެވެ.
މަޖިލީހުގެ އިގްތިސާދީ ކޮމިޓީގެ މިއަދުގެ ބައްދަލުވުމުގައި މިނިސްޓަރު އަމީރު ވިދާޅުވީ މިނިމަމް ވޭޖް ކަނޑައެޅުމަށް ތާއީދުކުރައްވާ ކަމަށާއި ނަމަވެސް ފުރަތަމަ މަސައްކަތް ކުރަންވީ މިއަހަރުގެ ކުރީކޮޅު ރާއްޖޭގެ އިގްތިސާދު އޮތް ހާލަތަށް އަނބުރާ ދިޔުމަށް ކަމަށެވެ.
"މިނިވަން ވޭޖް ކަނޑައެޅުމުގައި އަޅުގަނޑަށް ފެންނަ ފެނުމުގައި މިއީ އެންމެ ރަނގަޅު ވަގުތެއް ނޫން. ދުނިޔޭގެ ހުރިހާ ގައުމެއްގެ އިގްތިސޯދު ވެސް އަދި އަޅުގަނޑުމެންނަށް އެންމެ ޔަގީންކަމާއި އެކު ނޭނގޭ ކިހިނެކުން ކަމެއް އަޅުގަނޑުމެން އިގްތިސޯދު ބަދަލުވެގެން ދާނީއެއް" އަމީރު ވިދާޅުވިއެވެ.
އެންމެ ކުޑަ އުޖޫރައިގެ ގޮތުގައި 6،400 ރުފިޔާ ކަނޑައެޅުމަށް މިނިމަމް ވޭޖު އެޑްވައިޒަރީ ބޯޑުން ވަނީ އިކޮނޮމިކް މިނިސްޓަރަށް ލަފާ އަރުވާފައެވެ.
މިނިމަމް ވޭޖް ބޯޑުގެ ލަފާގައި ވަނީ، އެންމެ ކުޑަ އުޖޫރައަކީ އަސާސީ މުސާރައިގެ ގޮތުގައި 6،400 ރުފިޔާ ކަނޑައެޅުމަށެވެ. އަދި ސިވިލް ސާވިސްގައި މަސައްކަތްކުރާ މުވައްޒަފުންނާއި ފަތުރުވެރިކަމުގެ ދާއިރާގައި މަސައްކަތްކުރާ ފަރާތްތަކަށް 6،400 ރުފިޔާއާއި 8،600 ރުފިޔާއާ ދެމެދުގެ އަދަދެއް ކަނޑައެޅުމަށެވެ. މި އަދަދުތަކަކީ ވެސް މާ ބޮޑެތި އަދަދުތަކެއް ކަމަށް އަމީރު ވިދާޅުވިއެވެ.
