އަންނަ ހޯމަ ދުވަހު މަޖިލިސް ކައިރީ މުޒާހަރާ ކުރަނީ

އަންނަ ހޯމަ ދުވަހު ރައްޔިތުންގެ މަޖިލީހުގެ އިދާރާގެ ކުރިމަތީގައި މުޒާހަރާއެއް ކުރުމަށް ސިޔާސީ ހަރަކާތް ހިންގާ "ނަވާނަވައި"އިން ނިންމައިފި އެވެ.

Ads by Sosun Fihaara

ނަވާނަވައިއިން މިއަދު ބުނީ، އަންނަ ހޯމަ ދުވަހު މަޖިލިސް ކުރިމަތީގައި މުޒާހަރާ ކުރަން އެ ހަރަކާތުން ނިންމާފައިވާ ކަމަށެވެ. މިއީ "މަޖިލިސް ހޭލައްވާ" މުޒާހަރާއެއްގެ ގޮތުުގައި އެ ހަރަކާތުން ސިފަ ކުރެއެވެ.

ނަވާނަވައިގެ ސްޕޯކްޕާސަން ފާތިމަތު ސާއިރާ ރާއްޖޭގެ ބައެއް ނޫސްތަކަށް މައުލޫމާތު ދެއްވަމުން ވިދާޅުވީ މުޒާހަރާގެ އިންތިޒާމުގައި ބައިވެރިވާން ކޮންމެ މީހަކަށް ވެސްް ފުރުސަތު އެބަ އޮތް ކަމަށާއި ބައިވެރިވާން ބޭނުންވާ ފަރާތްތަކުން 9477309 އަށް ގުޅުމަށް އިއުލާން ކޮށްފައިވާނެ ކަމަށެވެ.

އޭނާ ވިދާޅުވީ މުޒާހަރާގައި މައިގަނޑު ގޮތެއްގައި އިހުތިޖާޖު ކުރާނީ ހަތަރު ހަތަރު ކަމަކަށް ގޮވާލައި ކަމަށެވެ. އެއީ ކުލި ނުދެއްކިގެން އާއިލާތައް މަގުމަތި ކުރުން ހުއްޓުވުމަށާއި، ތިމާވެށި ހަލާކު ކުރުން ހުއްޓުވުމަށާއި، ކުޑަކުދިންނާއި އަންހެނުންގެ ރައްކާތެރިކަން ކަމަށަވަރު ކުރުމުގެ މަސައްކަތަށް ފައިސާ ހަމަޖެއްސުމާއި، އިންކަމް ސަޕޯޓު އެލަވަންސް ނުލިބޭ ފަރާތްތަކަށް އެލަވަންސް ދިނުން އަވަސް ކުރުމަށެެވެ.

އެ މުޒާހަރާ އިންތިޒާމު ކުރަން ބޭނުންވާ ފަރާތްތަކާއެކު ނަވާނަވައިން މާދަމާ ރޭގަނޑު 8:00 ގައި އޮންލައިންކޮށް ބައްދަލުވުމެއް ބާއްވާނެ ކަމަށް ސާއިރާ ވިދާޅުވި އެވެ. އޭގެ ފަހުން އަންނަ ހޯމަ ދުވަހު މަޖިލިސް ކައިރީގައި މުޒާހަރާ ކުރުމަށް ނިންމާފައިވާ ކަމަށް ވެސް ސާއިރާ ވިދާޅުވި އެވެ.