ސުޝާންތުގެ މަރު: ސަލްމާން ޚާން އަދި ކަރަން ޖޯހަރް އާއެކު އިތުރު ހަ މީހެއްގެ މައްޗަށް ދައުވާކޮށްފި!
ބޮލީވުޑްގެ ޒުވާން ފިލްމީތަރި ސުޝާންތު ސިންގް ރާޖްޕޫތުގެ މަރުގެ ޒިންމާ ނަގަން ޖެހޭ ކަމަށް ބުނެ ބޮލީވުޑްގެ މަޝްހޫރު ފަންނާނުންތަކެއްގެ މައްޗަށް ދައުވާ ކޮށްފިއެވެ.
އެގޮތުން ސުޝާންތުގެ މަރުގެ ޒިންމާ ނަގަންޖެހޭ ކަމަށް ތުހުމަތުކޮށް ބިހާރް ކޯޓުގައި ދައުވާ ކޮށްފައިވަނީ ބޮލީވުޑްގެ ސުޕާސްޓާ ސަލްމާން ޚާން އާއި ޕްރޮޑިއުސަރ ކަރަން ޖޯހަރާއި، ޑައިރެކްޓަރ ސަންޖޭލީލާ ބަންސާލީ އަދި އެކްތާ ކަޕޫރުގެ އިތުރުން ހަތަރު މީހެއްގެ މައްޗަށެވެ.
އަމިއްލައަށް މަރުވިކަމުގައި ވިޔަސް، ސުޝާންތުގެ މަރަށްފަހު ބޮލީވުޑްގެ އެތައް ސިއްރުތަކާއި "އަނދިފަރާތް" ވަނީ ހާމަވާން ފަށާފައެވެ.
އެގޮތުން އޭނާގެ ދިފާއުގައި ބޮލީވުޑްގެ ބައެއް ތަރިން ކަމުގައިވާ ކަންގްނާ ރަނާވަތު އާއި، ރަވީނާ ޓަންޑަން، ސައިފް އަލީ ޚާން، އަދި ޑައިރެކްޓާ އަބީނަވް ކަޝްޔަޕް އާއި ޕްރަކާޝް ރާޖް ގެ އިތުރުން ވެސް ބައެއް ފަރާތްތަކުން ވަނީ އަޑުއުފުލާފައެވެ.
އެމީހުން ބުނެފައިވަނީ ބޮލީވުޑްގައި، އެހެން "ބޮޑެތި ސްޓާރުންގެ ދަރިންނަށް ނުވަތަ އާއިލާ މީހަކަށްވީތީ" އެކްޓިންގަށް ބަލާއިރު ކިތަންމެ މޮޅު ނޫނަސް ދެމުން އަންނަ މުހިންމުކަން ބޮޑު ކަމަށާއި، އޭގެ ސަބަބުން ބުރަ މަސައްކަތުން ބޮލީވުޑަށް އަންނަ ތަރިންގެ މަސައްކަތުގެ އަގު ވަޒަން ނުކުރެވި އެމީހުންނަށް އެއްވެސް ކުރިމަގެއް ފެންނަމުން ނުދާ ކަމަށެވެ.
ސުޝާންތާއިމެދު ވެސް ބޮލީވުޑްގެ މަޝްހޫރު ބައެއް މީހުން އެފަދައިން ކަންތައްކުރި ކަމަށާއި އޭނާ ދުނިޔޭގައި ހުރިއިރު އޭނާއަށް ގަނާކޮށް، ބާކީވެސް ކުރިކަމަށް ބުންޏެވެ. އަދި މަޝްހޫރު ޕްރޮޑިއުސަރަކާއި ސުޝާންތާއި ޖެހުނު މައްސަލައެއްގައި، ސުޝާންތުގެ ކެރިއަރު އެހިސާބުން ހަލާކު ކޮށްލާނެ ކަމަށް ބުނި ކަމަށާއި އޭނާއަށް ލިބުނު ފިލްމުތައްވެސް ގެއްލުނުކަމަށް ބުންޏެވެ.
އެޑްވޮކޭޓް ސުދީރް ކުމާރް އޯޖާ މިއަދު ބުނެފައިވަނީ އައިޕީސީ ސެކްޝަން 306، 109، 504 އަދި 506 ގެ ދަށުން ސުޝާތުގެ މަރުގެ ޒިންމާގައި ކަރަން ޖޯހަރް، ސަންޖޭ ލީލާ ބަންސާލީ، ސަލްމާން ޚާން އަދި އެކްތާ ކަޕޫރްގެ މައްޗަށް ދައުވާ އުފުލާފައިވާނެ ކަމަށެވެ.
"އެންމެ ހަ މަސް ތެރޭގައި ސުޝާންތަށް ލިބުނު ހަތް ފިލްމުން އޭނާ ވަނީ ދުރުކޮށްފަ. ދެން ހުރި ފިލްމުތަކުގެ އެކި މައްސަލަތައް ޖެހެމުން އަންނަ ކަމަށްބުނެ، އެފިލްމުތަކުގެ މަސައްކަތްވެސް ވަނީ ގަސްތުގައި ނުފަށާ މަޑުޖައްސާލައިފަ. ބެލެވޭގޮތުގައި ސުޝާންތު އެފަދަ ބޮޑު ނިންމުމެއް ނިންމީ އޭނާއާއިމެދު އިންޑަސްޓްރީގައި ކަންތައް ކުރަމުން އައި ގޮތުން" އެޑްވޮކޭޓް ބުނެފައިވެއެވެ.
ސަލްމާން ޚާން، ކަރަން ޖޯހަރް، ސަންޖޭ ލީލާ ބަންސާލީ އަދި އެކްތާ ކަޕޫރްގެ އިތުރުން ދައުވާ ކޮށްފައިވާ ހަތަރު ފަރާތެއްގެ ނަން އަދި ހާމަކޮށްފައެއް ނުވެއެވެ.
ބާންޑްރާގައި ސުޝާންތު ދިރިއުޅޭ އެޕާޓްމަންޓުގައި އޭނާ އަމިއްލައަށް މަރުވެފައި ހުއްޓާ ފެނިފައިވަނީ މިމަހުގެ 14 ވަނަ ދުވަހުގައެވެ.
