ގެއިން ނެރެލުމުގެ ކުރިން ދެ މަހުގެ ނޯޓިސްއެއް ދޭން ޖެހޭ ގޮތަށް ބިލް ހުށަހަޅައިފި
ކޮވިޑް-19ގެ ސަބަބުން ކުރިމަތިވެފައިވާ މާލީ ދަތިކަމުގެ ސަބަބުން ކުލި ނުދެއްކިގެން ގެއިން ނެރުމުގެ ކުރިން ދެ މަސް ދުވަހުގެ ނޯޓިސް އެބަޔަކަށް ދޭން ލާޒިމުކޮށް ސަންސެޓް ގާނޫނެއް މިއަދު މަޖިލީހަށް ހުށަހަޅައިފި އެވެ.
ސަރުކާރުގެ ފަރާތުން ފުވައްމުލަކު މެދު ދާއިރާގެ މެމްބަރު ހުސައިން މުހައްމަދު ދީދީ ހުށަހެޅުއްވި "އާންމު ސިއްހަތުގެ ކުއްލި ނުރައްކަލުގެ ބިލް 2020" އަށް ބަހުސް ކުރައްވަމުން މެމްބަރުން ވިދާޅުވީ އެ ބިލް ރައްޔިތުންގެ މަޖިލީހަށް ހުށަހެޅުން ލަސްވެއްޖެ ކަމަށާއި ކޮމެޓީ މަރުހަލާގައި އެ ބިލަށް ގިނަ އިސްލާހުތަކެއް ގެންނަން ޖެހޭ ކަމަށެވެ.
"މި ބިލް މަޖިލީހަށް އަންނަން މިހާރު މާ ލަސްވެޖެ. އަޅުގަނޑުގެ ހިޔާލު ވެސް މި ބިލާއި ދޭތެރޭގައި ކުޑަކޮށް ތަފާތު. އެއީ ސަން ސެޓް ގާނޫނެއްގެ ބަދަލުގައި މި ގާނޫނު ވާން ޖެހޭނީ ކުރިއަށް މުސްތަގްބަލްގައި މިހެނެ ދިމާވެދާނެ މިކަހަލަ ހާއްސަ ހާލަތްތަކުގައި އަމަލު ކުރެވޭނެ ބިލެއް ގޮތުގައި އޮތުން މުހިންމު ކަމުގައި އަޅުގަނޑު ފާހަގަކޮށްލަން،" މުހައްމަދު ރަޝީދު ވިދާޅުވި އެވެ.
އެ ބިލުގައި ވަނީ އެގްރިމެންޓަކާ ނުލައި ކުއްޔަށް ދީފައިވާ ތަންތަނުން ވެސް މީހުން ނެރެވޭނީ ނޯޓިސް ދީގެން ކަމަށެެވެ. އަދި ގެއިން ނެރޭއިރު އިޖުރާތްތަކެއް ފުރިހަމަ ކުރުމަށް ވެސް އެ ބިލުން ލާޒިމްކުރެ އެވެ.
ނޯޓިސް ދޭ މުއްދަތުގެ ތެރޭގައި އެ ގެއަކުން އަސާސީ ހިދުމަތްތައް ކަނޑާލައިގެން ނުވާނެ ކަމަށް ވެސް ބިލުގައި ވަނީ ބުނެފަ އެވެ. ކުއްޔަށް އުޅޭ މީހުންގެ މިނިވަންކަމަށް ހުރަސް އެޅޭނެ އެއްވެސް ކަމެއް ތަން ކުއްޔަށް ދީފައި ހުންނަ ފަރާތުން ކޮށްގެން ނުވާނެ ކަމަށް ވެސް ބިލުގައި ބުނެ އެވެ. އެކަންކަމާ ހިލާފަށް އަމަލުކުރާ މީހުންނަށް ކަނޑައަޅާފައިވާ އަދަބަކީ 5،000ރ. އިން ޖޫރިމަނާ ކުރުމެވެ.
ބިލުގައި ބުނެފައިވާ ގޮތާ ހިލާފަށް މީހަކު އަމަލު ކޮށްފި ނަމަ އެކަން ހައުސިން މިނިސްޓްރީއަށް ހުށަހެޅުމުގެ ހައްގު އޮވެ އެވެ. އެ ޝަކުވާތައް ބެލުމުގައި އަމަލުކުރާނެ ގަވައިދެއް ހައުސިން މިނިސްޓްރީން އެކުލަވާލަން ޖެހޭނެ ކަމަށް ވެސް ބިލުގައި ވަނީ ބުނެފަ އެވެ.
Ads by STO
