ދައުވާ ކުރީތީ ޝުކުރިއްޔާ، ސުޝާންތު މިދާއިރާއަށް ތަޢާރަފްކޮށްދިނީ އަހަރެން: އެކްތާ ކަޕޫރް
ބޮލީވުޑްގެ އެކްޓަރ ސުޝާންތު ސިންގް ރާޖްޕޫތުގެ މަރުގެ ޒިންމާ ނަގަންޖެހޭނެ ކަމަށް ބުނެ ދައުވާ އުފުލާފައިވާ އަށް މީހުންގެ ތެރެއިން، އެކްތާ ކަޕޫރް އެކަމާއި ގުޅިގެން ރައްދު ދީފިއެވެ.
އެގޮތުން އެކްތާ ބުނީ ސުޝާންތުގެ މަރުގެ ދައުވާ އޭނާގެ މައްޗަށް އުފުލީތީ ވަރަށް ބޮޑަށް ޝުކުރު އަދާ ކުރާ ކަމަށާއި، އެހެންނަމަވެސް ސުޝާންތު އެކްޓިންގެ ދާއިރާއަށް ތަޢާރަފު ކޮށްދިނީ އެކްތާ ކަމަށެވެ.
އެއީ ތެދެކެވެ. ސުޝާންތު އެންމެ ފުރަތަމަ އެކްޓު ކޮށްފައިވަނީ އެކްތާ ޕްރޮޑިއުސް ކޮށްފައިވާ "ޕަވިތުރަ ރިޝްތާ" ގައެވެ.
އެކްތާ އާއި ކަރަން ޖޯހަރް އަދި ސަންޖޭ ލީލާ ބަންސާލީ ގެ އިތުރުން ސުޕާސްޓާ ސަލްމާން ޚާން އާއި އިތުރު ހަތަރު މީހެއްގެ މައްޗަށް، އުފުލާފައިވާ އެދައުވާގެ ޚަބަރު އިންސްޓަގްރާމްގައި ހިއްސާ ކުރަމުން އެކްތާ ބުނެފައިވަނީ އެޚަބަރުގެ ސަބަބުން ވަރަށް ބޮޑަށް އޭނާ މާޔޫސްވެ ހިތްހަމަ ނުޖެހިއްޖެ ކަމަށާއި ސުޝާންތު އެންމެ ފުރަތަމަ މިދާއިރާއަށް ނެރެދިން މީހަކީ ވެސް އޭނާ ކަމަށެވެ.
އެޕޯސްޓުގައި އެކްތާ ބުނެފައިވަނީ އެފަދަ ތުހުމަތެއް ކުރުމުން ވަރަށް ބޮޑަށް ހައިރާން ވެއްޖެ ކަމަށާއި ސުޝާންތު ނެތުމުގެ ހިތާމަ މިނިވަންކަމާއެކު ކުރިޔަ ދިނުމަށެވެ.
އެޑްވޮކޭޓް ސުދީރް ކުމާރް އޯޖާ ބުނެފައިވަނީ އެކްތާ، ސަލްމާން، ކަރަން، ސަންޖޭލީލާ އަދި އިތުރު ހަތަރު މީހަކަށް އެދައުވާ ކޮށްފައިވަނީ ސުޝާންތު ކެރިއަރަށް ބުރޫއަރުވާ، ނުފޫޒު ފޯރުވާ، ސުޝާންތަށް ލިބުނު ފިލްމުތައް ވެސް އޭނާއަށް ގެއްލުމުގައި އެމީހުންގެ އަތެއްވުމާއި ގުޅިގެން ކަމަށެވެ.
ބާންޑްރާ ގައި ސުޝާންތު ދިރިއުޅޭ އެޕާޓްމަންޓުގައި އޭނާ ދަންޖެހިގެން މަރުވެފައި ހުއްޓާ ފެނިފައިވަނީ މިމަހުގެ 14 ވަނަ ދުވަހުގައެވެ.
