ކައުންސިލް އިންތިޚާބާއި އަންހެނުންގެ ކޮމިޓީތަކުގެ އިންތިޚާބުގެ ކެނޑިޑޭޓުންނަށް ކެމްޕޭން ކުރުމުގެ ފުރުސަތު "ދެން" އިން!
އަންނަ އޭޕްރީލް މަހުގެ 10 ވަނަ ދުވަހު ބޭއްވުމަށް ހަމަޖެހިފައިވާ ލޯކަލް ކައުންސިލްތަކުގެ އިންތިޚާބާއި އަންހެނުންގެ ތަރައްޤީއަށް މަސައްކަތް ކުރާ ކޮމިޓީތަކުގެ އިންތިޚާބުގައި ވާދަ ކުރާ ކެނޑިޑޭޓުންނަށް "ދެން" މެދުވެރިކޮށް ކެމްޕޭން ކުރުމުގެ ފުރުސަތު އެ ނޫހުން ހުޅުވާލައިފިއެވެ.
"ދެން"ގެ ސީއީއޯ މުޙައްމަދު އަރީޙް ވިދާޅުވީ ރަށު ކައުންސިލަރުންނާއި ސިޓީ ކައުންސިލްގެ މެމްބަރުންގެ އިތުރުން އަންހެނުންގެ ކޮމިޓީތަކުގެ މެމްބަރުންނަކީ ރައްޔިތުންނާ އެންމެ ގާތުން މަސައްކަތް ކުރާ ރައްޔިތުންގެ މަންދޫބުން ކަމަށްވެފައި އެ މަގާމަށް އައުމަށް މަސައްކަތް ކުރާ ކެނޑިޑޭޓުންގެ ބަސް އާންމުންނަށް އިއްވައިދިނުމަކީ މުހިންމު ކަމަކަށްވާތީ މި ފުރުސަތަކީ އެގޮތުން ހުޅުވާލި ފުރުސަތެއް ކަމަށެވެ.
އަރީހް ވިދާޅުވީ ޚާއްޞަ އަގުތަކެއްގައި އެ ނޫސް މެދުވެރިކޮށް ކެމްޕޭން ކުރުމުގެ ފުރުސަތު މިހާރު ހުޅުވާލާފައިވާ ކަމަށާއި މިއީ ކެނޑިޑޭޓުންނަށް ރަނގަޅު، ފަހި ފުރުސަތަކަށް ވުމަށް އުއްމީދު ކުރާ ކަމަށެވެ.
"މަންދޫބުންގެ ބަސްގެ ގޮތުގައި އަޅުގަނޑުމެން މި ކެމްޕޭން މި ގެންދަނީ ، މީގައި އަޅުގަނޑުމެން ދެ ބައެއް މި ހުޅުވާލަނީ ކެނޑިޑޭޓުންނަށް ، އެއް ބަޔަކީ ކެނޑިޑޭޓުންގެ ޕްރޮފައިލް ރިޕޯޓް ގެނެސްދިނުން، އޭގެ އިތުރުން ކެމްޕޭން ހަރަކާތްތަކާއި ކެނޑިޑޭޓުން ރައްޔިތުންނަށް ދޭން ބޭނުންވާ މެސެޖުތައް ދިނުން ވެސް މި ހުޅުވާލާ ފުރުސަތުގެ ތެރޭގައި އޮންނާނެ" އަރީޙް ވިދާޅުވިއެވެ.
އަރީޙް ވިދާޅުވީ، މިފަދަ ޕެޖޭކެއް "ދެން" އިން ތަޢާރަފްކޮށްފައިވަނީ، ކޮވިޑް-19 އާ ގުޅިގެން ސީދާ ހަރަކާތްތައް ނިކުމެ، ކެންޕެއިން ކުރަން ދަތިވާނެތީ، ކެނޑިޑޭޓުންގެ ބަސް، ރައްޔިތުންނާ ހަމައަށް ގެނެސްދިނުމުގައި ފަސޭހަ ކުރުމުގެ ގޮތުން ކަމަށެވެ.
އަރީޙް ވިދާޅުވީ "ދެން" މެދުވެރިކޮށް ކެމްޕޭން ކުރުމަށް ބޭނުންވާ ފަރާތްތަކުން މި ލިންކަށް ވަޑައިގެން ރެޖިސްޓްރީ ކުރެއްވުން އެދޭ ކަމަށެވެ.
އަދި މި ކެމްޕޭނާ ގުޅޭ އިތުރު މައުލޫމާތު ސާފު ކުރަން ބޭނުންވާ ފަރާތްތަކުން 7728399 ނަމްބަރު ފޯނަށް ގުޅުއްވާ ނުވަތަ ޓެލެގްރާމް ކުރެއްވުން ނުވަތަ ދެންގެ ފޭސްބުކް ޕޭޖަށް މެސެޖް ކުރައްވައިގެންވެސް މައުލޫމާތު ސާފު ކުރެއްވޭނެ ކަމަށް އަރީޙް ވިދާޅުވިއެވެ.
"ދެން" އަކީ މަދު ދުވަސްކޮޅެއްގެ ތެރޭގައި ރާއްޖޭގައި ބޮޑު މަޤްބޫލުކަން ހޯދި ނޫހެކެވެ. މިގޮތުން މިހާރު ރާއްޖޭގައި 5 ވަނައަށް އެންމެ ގިނަ ބަޔަކު ޒިޔާރަތް ކުރާ ނޫހަކީ "ދެން" އެވެ.
