ކުޑަކުދިންނަށް ޚާއްސަ ވަގުތުގައި އެހެން މީހުން ބޭރަށް ނުނިކުތުމަށް ޑރ. އަފްޒަލް އިލްތިމާސް ކުރައްވައިފި
ފުރަބަންދަށް ދިން އިތުރު ލުއިތަކާއެކު ކުޑަކުދިން ބޭރަށް ނިކުންނަން ދީފައިވާ ޚާއްސަ ވަގުތުގައި އެހެން މީހުން ބޭރަށް ނުނިކުތުމަށް ޑރ. އިބްރާހިމް އަފްޒަލް އިލްތިމާސް ކުރައްވައިފިއެވެ.
ފުރަބަންދަށްފަހު މާލެ ސަރަޙައްދަށް ދީފައިވާ ލުއިތަކުގެ ތެރެއިން އުމުރުން ދުވަސްވީ މީހުން ކަސްރަތުކުރުމަށާއި ހިތްހަމަޖައްސާލުމަށް ބޭރަށް ނުކުތުމަށް ކަނޑައަޅާފައިވަނީ ފަތިހު 5 އިން ހެނދުނު 8 ޖެހުމާ ހަމައަށެވެ. އަދި ކުޑަކުދިން ބެލެނުވެރިޔަކާއެކު ބޭރަށްގެންދާ ވަގުތެއްގެ ގޮތުގައި އިއުލާންކޮށްފައިވަނީ ހަވީރު 4 އިން އިރުއޮއްސި 6 ޖެހުމާހަމައަށެވެ.
މިރޭ ބޭއްވި ނޫސްވެރިންގެ ބައްދަލުވުމުގައި ޑރ. އަފްޒަލް ވިދާޅުވީ އުމުރުން ދުވަސްވީ ކަސްރަތު ކުރާއިރު މާސްކް އެޅުން ރަނގަޅު ނޫން ކަމަށާއި އެހެންކަމުން އެ މީހުން ކަސްރަތުކުރާއިރު އެހެން މީހުންނާ ދުރުގައި ތިބުން މުހިންމު ކަމަށެވެ.
"އެހެންވީމަ އެހެން ބޭފުޅުން މިގަޑިތަކުގައި ބޭރަށް ނުކުތުން މަދުކުރުން ވީހާވެސް މުހިންމު. ހަމައެހެންމެ ކުޑަކުދިންގެ ވަގުތުކޮޅުގައިވެސް އެހެންމީހުން މަގުމަތޫގައި އުޅުން ވީހާވެސް މަދުކުރަންޖެހޭ" ޑރ. އަފްޒަލް ވިދާޅުވިއެވެ.
ލޮކްޑައުންއަށް ދޭ ލުއިތަކުގެ ފޭސް ދެއަކަށް މި މަހުގެ 15 ވަނަ ދުވަހުން ފެށިގެން އަމަލުކުރަން ފަށާފައިވާއިރު، ފަތިހު 5 އިން ފެށިގެން ރޭގަނޑު 10 ޖެހުމާހަމައަށް ހުއްދައަކާއި ނުލައި އާންމުން ބޭރުގައި އުޅުމަށް ވަނީ ހުއްދަދީފައެވެ. އެހެން ނަމެވެސް ބޭރަށް ނިކުތުން ވީހާވެސް މަދުކުރުމާއި ގައިދުރުކަން އިޚްތިޔާރުކުރުމުގެ އިތުރުން ރައްކާތެރިކަމުގެ ފިޔަވަޅުތައް އެޅުމަށް އެންއީއޯސީންވަނީ އިރުޝާދު ދެއްވާފައެވެ. އަދި ފުރަބަންދު އެއްކޮށް އުވާލާފައި ނުވާތީ އެއް ގެއިން އަނެއް ގެއަށް ދިއުމަކީ މިހާރުވެސް ހުއްދަކަމަކަށް ނުވާތީ ގޭގެއަށް ނުދިއުމަށް އެޗްޕީއޭއިން ވަނީ އިލްތިމާސް ކޮށްފައެވެ.
